“Do të shkoj në Rusi të premten”, Trump harron që Alaska është në SHBA

Presidenti amerikan Donald Trump duket se e ngatërroi Rusinë me Alaskën përpara takimit të tij me presidentin rus Vladimir Putin.

Kjo, ndërsa mbajti një konferencë për shtyp duke folur për krimin në Washington, DC dhe planet e tij për të vendosur Gardën Kombëtare dhe për të vënë policinë e qytetit nën kontrollin e tij.

Trump mbajti një konferencë për shtyp me Prokuroren e Përgjithshme Pam Bondi dhe Sekretarin e Mbrojtjes Pete Hegseth, ku ai kritikoi nivelin e krimit në Washington, DC.

“Kjo është një emergjencë tragjike dhe është e turpshme për mua të jem këtu lart”, u tha Trump gazetarëve. “E dini, do të takoj Putinin. Do të shkoj në Rusi të premten. Nuk më pëlqen të jem këtu lart, duke folur për sa i pasigurt dhe sa i ndyrë dhe i neveritshëm ishte ky kryeqytet dikur i bukur”.

Por Trump nuk do të shkojë në Rusi, por në Alaska për t’u takuar me Putinin.

Trump do të takohet me Putinin për të diskutuar përfundimin e luftës në Ukrainë që Rusia e nisi kur goditi Ukrainën në shkurt të vitit 2022.

“Takimi shumë i pritur midis meje, si President i Shteteve të Bashkuara të Amerikës, dhe Presidentit Vladimir Putin të Rusisë, do të zhvillohet të premten e ardhshme, më 15 gusht 2025, në Shtetin e Madh të Alaskës”, tha Trump javën e kaluar në Truth Social.

Takimi do të jetë i pari midis një presidenti amerikan dhe Putinit që nga viti 2021, kur Joe Biden u takua me Putinin në Zvicër.