Gjykata Themelore e Prishtinës ia ka caktuar masën e paraburgimit prej një muaji Jovan Viqentijeviq-it, të dyshuarit për sulmin terrorist në kanalin e Ibër Lepencit në Zubin Potok.
Kjo erdhi pas kërkesës së Prokurorisë Speciale të Kosovës për caktimin e masës së paraburgimit ndaj Viqentijeviq-it, në të cilën thuhet se ekziston dyshimi i bazuar se ai bashkë me vëllain e tij, Dragisha Viqentijeviq, me qëllim kanë dëmtuar pajisjen e ujësjellësit dhe kanë kryer veprën terroriste, duke përdorur eksploziv.
Në dosjen e Prokurorisë, thuhet se ekziston dyshimi se i bazuar se më 29 nëntor 2024, rreth orës 18:50 në fshatin Varagë, Komuna e Zubin-Potokut, respektivisht në pjesën e kanalit Ibër-Lepenc, Jovan Viqentijeviq në bashkëkryerje me të dyshuarin Dragisha Viqentijevq, me qëllim të shqetësimit serioz të banorëve dhe cenimit të rendit kushtetues dhe sigurisë publike në Kosovë, qëllimisht kanë dëmtuar pajisjet publike të ujësjellësit dhe kanë kryer veprën penale terroriste duke përdorur eksploziv dhe mjete eksplozive drejtpërdrejt në pjesën e kanalit dhe në infrastrukturën e betonit.
Sipas Prokurorisë, të dyshuarit e kanë aktivizuar eksplozivin dhe si pasojë kanë dëmtuar rëndë dhe e kanë bërë të papërdorshëm për shfrytëzim të mëtutjeshëm ujin, kështu që ua kanë pamundësuar qytetarëve furnizimin me ujë për pije dhe e kanë rrezikuar prodhimin e energjisë elektrikë në nivel te vendit.
