Që nga 24 shkurti, kur ushtria ruse filloi pushtimin e Ukrainës, Ministria ruse e Mbrojtjes ka raportuar humbjet e saj vetëm një herë: sipas pretendimeve të tyre, deri më 2 mars u vranë 498 ushtarë dhe u plagosën 1.597.
Ukraina, megjithatë, ka raportuar deri më tani 13,500 vdekje nga pala ruse. Ndoshta asnjëra palë nuk jep informacion të saktë.
Sipas mediave bjelloruse dhe kanaleve Telegram, shumë ushtarë rusë të plagosur transferohen në Bjellorusi, ku u jepet ndihma e parë, dhe më pas transportohen më tej në Rusi. Këtë e ka konfirmuar edhe presidenti i Bjellorusisë, Aleksandër Lukashenko. Pas pesë ditëve të para të luftës, ai tha se 160 deri në 170 ushtarë rusë po trajtoheshin vetëm në Gomel, Mosir dhe një qytet tjetër bjellorus.
Prerje të shpeshta të gjymtyrëve
Katër burime konfirmuan për Deutsche Welle-n se ushtarët rusë ndodhen në spitale në këto qytete në jug të Bjellorusisë. Përveç kësaj, një spital polak u ngrit në Narovlya, jo shumë larg kufirit ukrainas. Sipas një prej bashkëbiseduesve të DW, në Mosir po vijnë shumë të plagosur. “Shpesh pa krahë, këmbë, veshë apo sy.” Disa ushtarë u sollën shumë vonë dhe tashmë me gangrenë. “Nëse ushtarët do të silleshin në kohë, gjymtyrët mund të shpëtoheshin”, thanë burimet e DW.
Sipas tyre, disa prej të plagosurve nuk kanë ngrënë asgjë për pesë ditë, kanë qenë të çorientuar, nuk e kanë ditur se ku ndodheshin dhe kanë kërkuar vetëm të telefonojnë prindërit e tyre. “Këta janë pacientë të lindur në vitin 2003, nga rajone të varfra të Rusisë. Ata janë në fakt ende fëmijë,” thanë burimet për DW.
Një burim tjetër, i cili nuk ka lidhje të drejtpërdrejtë me shërbimin shëndetësor, por është i mirëinformuar për situatën, konfirmon se spitali në rajonin e Gomelit “funksionon pa ndërprerje” – deri në 50 persona në vetëm një natë. Mes tyre ka pacientë normalë civilë me operacione të planifikuara.
Kirurgët zakonisht duhet të presin gjymtyrët e ushtarëve rusë. “Spitali është plot”, ka thënë burimi, duke kërkuar që vendndodhja e klinikës të mos bëhet publike.
Disa burime të DW raportojnë se në Bjellorusi po sillen jo vetëm ushtarë të plagosur, por edhe të vdekur. Por asnjë nga bashkëbiseduesit nuk mund të japë të dhëna të sakta për numrin e të vdekurve.
Mjekët duhet të heshtin
Shumë mjekë të kontaktuar nga DW refuzuan të diskutonin për ndihmën mjekësore për ushtrinë ruse. Sipas dy bashkëbiseduesve, mjekët duhet të firmosnin detyrimin për ruajtjen e informacionit konfidencial.
Fondacioni i Solidaritetit Mjekësor Bjellorusi vëren se të gjitha spitalet janë të kontrolluara shumë rreptësisht. “Punonjësit e KGB-së ose FSB-së punojnë drejtpërdrejt në spitale, të gjitha ndërtesat monitorohen. Shumë mjekë që teorikisht mund të thoshin diçka, janë hequr nga spitalet. Në vend të tyre janë punësuar rusët. Shumë mjekë dhe personel spitalor kanë frikë dhe nuk duan të flasin me askënd”.
Sipas Fondacionit të Solidaritetit Mjekësor Bjellorusi, numri i ushtarëve të vdekur është shumë i lartë. Spitalet në Bjellorusi janë të mbipopulluara. “Të gjithë të plagosurit, kudo që është e mundur, dërgohen me tren në Rusi,” tha një zëdhënës i fondacionit.
