Presidenti turk Tajip Erdogan ka anuluar planet për të marrë pjesë në konferencën e klimës COP26, pasi Britania nuk arriti të përmbushë kërkesat turke për garantimin e sigurisë, i thanë Reuters të hënën dy zyrtarë turq.
Erdogan u kthye në Turqi nga samiti i G20 në Romë në vend që të udhëtonte për në samitin e klimës në Glasgow, njoftoi agjencia shtetërore Anatolia. Presidenca turke nuk ka deklaruar arsyet e kthimit të tij të paplanifikuar.
Një zyrtar që donte të qëndronte anonim tha se kishte probleme me protokollin rreth pjesëmarrjes së planifikuar të presidentit në takim. Një tjetër zyrtar turk tha se autoritetet britanike nuk kishin përmbushur kërkesat e protokollit dhe sigurisë së Turqisë.
“Presidenti e mori atë vendim sepse kërkesat tona për numrin e automjeteve dhe disa kërkesa të tjera të sigurisë nuk janë përmbushur plotësisht”, tha një zyrtar i lartë për Reuters.
Erdogan më parë pritej të takohej me presidentin amerikan Joe Biden, por ata u takuan në Romë të dielën.
Marrëveshja e Parisit për Klimën
Muajin e kaluar, parlamenti turk ratifikoi Marrëveshjen e Parisit për Klimën, duke u bërë vendi i fundit i G20 që e bën këtë.
Turqia e ka vonuar ratifikimin prej vitesh, duke thënë se nuk duhet të konsiderohet një vend i zhvilluar.
Erdogan tha javën e kaluar se Turqia kishte nënshkruar një memorandum mirëkuptimi sipas të cilit do të merrte 3.2 miliardë dollarë kredi për ta ndihmuar atë të përmbushte objektivat e saj për energjinë e pastër të përcaktuara nga Marrëveshja e Parisit.
