Escobar: Sulmet ndaj serbëve në veri nuk vijnë nga shqiptarët, por nga serbët

Sipas të dërguarit të ShBA-ve për Ballkanin Perëndimor, Gabriel Escobar, përgjegjës për sulmet ndaj serbëve në veri janë vetë serbët.Escobar deklaroi se këto kërcënime nuk vijnë nga shqiptarët, ndaj edhe mendon se serbët duhet ndalur sulmet ndaj pjesëtarëve të komunitetit që i përkasin.

“Djegia e automjeteve, pasurisë së paluajtshme dhe kërcënimet ndaj njerëzve që duan të integrohen nuk vijnë nga shqiptarët etnikë, por nga serbët, kështu që mendoj se kërcënimet ndaj komunitetit serb në Kosovë duhet të ndalen nga të gjitha anët”, tha Escobari për mediumin Tanjug.

Ai tha se SHBA-të po kërkojnë që serbët të kthehen në departamentet e policisë, sepse nuk mund të ketë një komunitet që nuk ka shërbime komunale dhe që nuk ka forcë policore.“Kemi kërkuar që serbët të kthehen në institucione që të mos ketë arsye që shqiptarët etnikë të jenë të pranishëm atje. Kjo është një pyetje vërtet komplekse. Do të duhet një kompromis nga të dyja palët për të gjetur një zgjidhje”.

I njëjti shtoi se presin që të dy palët në dialog, Kosova dhe Serbia, të ofrojnë një kornizë kohore për zbatimin e plotë të marrëveshjes së Ohrit dhe propozimet fillestare për formimin e Asociacionit të komunave me shumicë serbe.“Të gjitha palët duhet të vijnë të përgatitura”, tha Escobar.