Fashisti Vulin i zemëruar me deklaratën e Stano-s: “President, mjaft u përkulët para hipokrizisë së BE-së”

Deklarata e Zëdhënësit të Bashkimit Evropian, Peter Stano, se Kosova ka të drejtë të heqë nga përdorimi targat të lëshuara nga Serbia të destinuar për t’u përdorur në territorin e Kosovës, duket se ka zemëruar shumë udhëheqësit e shtetit Serb.

Në karvanin e të indinjuarve nga ky vendim i Qeverisë së Kosovës, ju është bashkuar – natyrisht- edhe ministri i Brendshëm i Serbisë, Aleksandër Vulin.

Ai, madje ka bërë thirrje presidentit serb, Aleksandër Vuçiç, që ky i fundit “të mos përkulët para hipokrizisë së Bashkimit Evropian”.

“Deklarata e Stanos, i përshtatet plotësisht BE-së dhe politikës së saj për të shkelur të gjitha marrëveshjet që ajo vetë i garanton me nënshkrimin e saj”, ka thënë Vulin.

Sipas Vulin, Stano, në reagimin e tij do të duhej të përmende edhe mos-themelimin e Asociacionit të Komunave me shumicë serbe, nga pala kosovare.

“President [Vuçiç], luftuat për neutralitet ushtarak, sa shantazhe dhe sulme të tjera duhet të vijnë nga Brukseli, para se të vendosni të pyesni serbët nëse duan edhe ata neutralitet politik. Ka kohë që na gënjejnë dhe na shantazhojnë, le të marrin përgjegjësi për gënjeshtrat e tyre”, ka shtuar ai.

Qeveria e Kosovës, në mbledhjen 85-të, të enjten e 29 qershorit, ka miratuar vendimin për të mundësuar regjistrimin e automjeteve me targa “RKS” për të gjitha automjetet e pajisura me targat “PR”, “KM”, “PZ”, “GL”, “UR”, “PE”, “DA” apo “ĐA”, si dhe vendimin për kalimin e kufirit shtetëror nga qytetarët me dokumente personale të lëshuara nga autoritetet e Serbisë.

Që nga ky vendim, por jo vetëm, autoritete serbe nuk janë ndalur së ankuari.

Ankesa e tyre, ka filluar të marrë një dimension tjetër kur Peter Stano, Zëdhënësi i Bashkimit Evropian, tha se sipas marrëveshjeve të arritura në kuadër të dialogut për lirinë e lëvizjes, Kosova ka të drejtë që gradualisht të heqë nga përdorimi targat “KM” të lëshuara nga Serbia.