Qeveria e Kosovës ka publikuar një manual për kursim të energjisë elektrike, pas krizës që ka kapluar vendin dhe gjithë botën nga ngritja e çmimit të saj.
Në manualin e publikuar nga ministrja e Ekonomisë, Artane Rizvanolli, këshilla e parë është që të kursehet në ndriçim.
“Fikja e dritave kur del nga dhoma/shtëpia”, është këshilla e parë në këtë pikë. Aty rekomandohet edhe zëvendësimi i poçave elektrikë me ata me eficiencë të lartë (LED).
Ndërkaq bëhet thirrje edhe për shfrytëzim të rrymës në orarin 22:00 – 07:00 kur edhe tarifa është më e ulët. Sipas manualit, në këtë kohë rekomandohet përdorimi i rrobalarëses, enëlarëses dhe hekurit për hekurosje.
Manuali tutje vazhdon me këshillën për ndalje të ujit të ngrohtë kur qytetarët i lajnë dhëmbët. Kjo sepse “shfrytëzimi sa më racional i ujit të ngrohtë rrit kursimin e energjisë”.
Po ashtu thuhet se s’duhet të lihen gjatë natës në rrymë mbushësit e telefonave, llaptopëve etj.
Kriza energjetike ka bërë që së fundmi të ketë ngritje enorme të çmimit me të cilin importohet rryma në Kosovë. Nga Qeveria kanë thënë se s’mund të garantohet që s’do të ketë ngritje çmimesh.
