Militantët që po luftojnë përkrah forcave turke gjatë ofensivës së Ankarasë gjatë kufirit mes Turqisë dhe Sirisë kanë ekzekutuar të paktën nëntë civilë, përfshirë një politikane kurde. Lajmin e bëri të ditur një monitorues i të drejtave të njeriut, transmeton Gazeta Metro.
“Nëntë civilë janë ekzekutuar në momente të ndryshme në pjesën jugore të qytetit Tal Abyad”, tha Vëzhguesi Sirian për të Drejtat e Njeriut. Sipas forcave kurde, në mesin e personave të ekzekutuar është politikania Hevrin Khalaf, raporton The Guardian.
Forcat Demokratike Siriane thanë përmes një deklarate se ajo është nxjerrë nga vetura gjatë një sulmi të përkrahur nga forcat turke dhe është ekzekutuar nga grupet mercenare të mbështetura nga Turqia. “Kjo është dëshmi e qartë se shteti turk po vazhdon politikën kriminale kundër civilëve të paarmatosur”, thuhet në deklaratë.
Khalaf ishte sekretare e përgjithshme e partisë “E Ardhmja e Sirisë”. Mutlu Civiroglu, njohës i politikës kurde, tha se vdekja e saj është një humbje e madhe. “Ajo kishte talent për diplomaci. Ajo gjithmonë merrte pjesë në takimet me amerikanët, francezët dhe delegacionet e huaja”, tha ky analist.
Turqia dhe aleatët e saj filluan të mërkurën ofensivën kundër njësiteve kurde, të cilat janë shtylla e Forcave Demokratike Siriane. Presidenti turk, Erdogan, ka thënë se dëshiron të krijojë një zonë të lirë në veri të Sirisë, ku do të mund të vendoseshin refugjatët që tashmë jetojnë në Turqi, shkruan “The Guardian”.
