Frikë nga fuqia e Rusisë, Gjermania blen 35 avionë luftarakë

Gjermania do të blejë dhjetëra avionë luftarakë të llojit F-35 nga Shtetet e Bashkuara të Amerikës. Lajmin e ka bërë të ditur ministrja gjermane e Mbrojtjes, e cila ka saktësuar se avionët që Berlini zyrtar do të blejë janë 35.

Ministrja e ka justifikuar blerjen me argumentin se vendi duhet të zëvendësojë flotën e vjetër të avionëve, por njoftimi i saj vjen në një kohë kur Rusia po sulmon Ukrainën, gjë që shtyu kancelarin Olaf Scholz të deklaronte se do të investonte 100 miliardë euro në fushën e mbrojtjes.

“Pasi shqyrtuam të gjitha opsionet, kam vendosur të inicioj blerjen e avionëve F-35 për të zëvendësuar Tornado”, tha ministrja Christine Lambrecht.

Tornado është avioni i vetëm gjerman që është në gjendje të mbajë bomba nukleare amerikane, të cilat mbahen në Gjermani në rast të një konflikti të mundshëm.

Berlini gjithashtu do të blejë 15 avionë Eurofighter që do të prodhohen nga firma franko-gjermane Airbus sipas një dokumenti konfidencial, raporton Reuters.