“Frikë për pushtim në shkallë të gjerë”- WSJ: Turqia grumbullon trupa dhe armatime në kufirin e Sirisë

Zyrtarët amerikanë po japin alarmin për një operacion të mundshëm ushtarak në shkallë të gjerë nga Turqia në veri të Sirisë, duke synuar zonat e kontrolluara nga kurdët e mbështetur nga SHBA.

Mediat e huaja thonë se sipas të njëjtave burime, forca të konsiderueshme ushtarake turke, të përbëra nga milici, komando dhe artileri të rëndë, janë mbledhur në kufirin pranë Kobanit, një qytet me shumicë kurde.

Këto lëvizje filluan pas rënies së regjimit të Assadit në fillim të dhjetorit, duke kujtuar lëvizjet e Ankarasë përpara pushtimit të Sirisë verilindore në vitin 2019. “Ne po monitorojmë situatën dhe po bëjmë presion për përmbajtje”, tha një zyrtar amerikan.

Sipas Wall Street Journal, Ilham Ahmed, një zyrtar në administratën politike kurde, i shkroi një letër presidentit të zgjedhur të SHBA-së, Donald Trump, duke i kërkuar që të ndërhyjë dhe të bindë presidentin turk, Rexhep Tajip Erdogan, të mos vazhdojë me një tjetër pushtim. “Qëllimi i Turqisë është të vendosë kontrollin e saj mbi territoret tona përpara se të merrni ju detyrën, duke ju detyruar të angazhoheni me ta si udhëheqës të territorit tonë,” tha Ahmed në letrën e tij, duke paralajmëruar “pasoja katastrofike” në rast të ndërhyrjes turke.

Ky zhvillim i ka vënë Forcat Demokratike Siriane (SDF) të udhëhequra nga kurdët në një pozitë të cënueshme. Sekretari i Jashtëm Anthony Blinken udhëtoi në Turqi javën e kaluar për të diskutuar të ardhmen e Sirisë me Erdoganin dhe për të kërkuar garanci se Ankaraja do të zvogëlojë operacionet kundër luftëtarëve kurdë.

Por bisedimet e ndërmjetësuara nga SHBA-ja për armëpushimin ndërmjet kurdëve sirianë dhe rebelëve të mbështetur nga Turqia në Kobani dështuan të hënën pa një marrëveshje, sipas një zëdhënësi të Forcave Demokratike Siriane. SDF tani po vëzhgon “përqëndrime të rëndësishme ushtarake” në lindje dhe në perëndim të qytetit, tha zëdhënësi.

“Nga kufiri, ne mund të shohim tashmë forcat turke të grumbulluara dhe civilët që jetojnë në frikë të vazhdueshme të vdekjes dhe shkatërrimit të afërt,” i shkroi Ahmed-Trump.

Ahmed paralajmëroi se një ofensivë turke do të zhvendoste më shumë se 200,000 civilë kurdë në Kobani dhe kujtoi zotimin e Trump në një takim të mëparshëm se Shtetet e Bashkuara “nuk do t’i braktisin kurdët”.

Ahmed i bëri thirrje Presidentit të zgjedhur Trump që të përdorë ndikimin e tij për të parandaluar pushtimin turk dhe për të mbrojtur komunitetet kurde që kanë qenë aleatë të vendosur në luftën për paqen dhe sigurinë. “Erdogan e ka dëgjuar zërin tuaj në të kaluarën”, theksoi ai, “dhe ne besojmë se lidershipi juaj mund ta parandalojë këtë fatkeqësi”.