Ministrja e Jashtme e Gjermanisë, Annalena Baerbock, ka deklaruar se angazhimi i Turqisë për t’u inkuadruar në Bashkimin Evropian tingëllon “gjithnjë e më i pasinqertë”, në ditët kur po protestohet për arrestimin e opozitarit Ekrem İmamoglu.
Ajo ka shkruar në rrjetin social X se një vend që pretendon inkuadrimin në BE duhet të mbështesë sundimin e ligjit.
“Konkurrentët politikë nuk i përkasin burgut apo gjykatave”, ka shkruar ajo, transmetoi BBC-ja.
Të hënën, Komisioni Evropian i ka kërkuar Turqisë t’i mbështesë vlerat demokratike si një vend që është anëtar i Këshillit të Evropës dhe kandidat për t’iu bashkuar BE-së. Turqia ka aplikuar për anëtarësim në vitin 1987 dhe i kishte nisur bisedimet për anëtarësim në 2005-n.
Ajo ka bërë pak përparim në këtë drejtim që nga 2016-a.
Vala aktuale e protestave në tërë Turqinë është përshkruar si më e madhja që nga protestat e Parkut Gezi në vitin 2013.
Protestat e asaj kohe kishin nisur mbi planet për të prishur parkun, si një nga pak hapësirat e gjelbra të mbetura të Stambollit në atë kohë. Disa njerëz ishin vrarë e mijëra ishin lënduar nga përleshja me policinë. Ato protesta sot kujtohen si simbol i rezistencës turke.
