Gjithçka nisi pas arrestimit të kreut të “Mbrojtjes Civile”: Policia me detaje për sulmin që u bë ndaj zyrtarëve policorë dhe gazetarëve

Policia e Kosovës, ka dhënë detaje për arrestimin e Milun Milenkovic, i cili është njeriu kryesor i të ashtuquajturës ‘Mbrojtja civile’ në veri ku edhe dyshohet për vepra të terrorizmit. Pas arrestimit të tij zyrtarë policorë dhe vetura të Policisë janë sulmuar në Mitrovicën e Veriut, Leposaviq dhe Zveçan

Në raportet e Policisë të dërguara sot për media, thuhet se gjatë arrestimit të djeshëm të Milenkovic, i njëjti me qëllim të shmangies së arrestimit të tij ka rezistuar dhe si pasojë e kësaj lëndime trupore ka pësuar një zyrtar policor dhe i dyshuari të cilët kanë pranuar tretman mjekësor. Me vendim të prokurorit, i dyshuari është dërguar në mbajtje.

Lidhur me rastin, pas operacionit policor një turmë e personave të dyshuar deri më tani të pa identifikuar, kanë sulmuar me gurë dhe me mjete të forta njësitet policore të Rendit Publik dhe veturat e policisë. Si pasojë e sulmeve lëndime trupore kanë pësuar tre zyrtarë policorë të cilëve iu është ofruar tretman mjekësor, po ashtu janë dëmtuar edhe tri vetura të Policisë së Kosovës. Në lidhje me rastin është konsultuar prokurori i shtetit, rasti vazhdon të hetohet.

Ndërsa poashtu dje në Mitrovicën e Veriut, derisa  katër zyrtarët policor ishin në drejtim të stacionit policor janë sulmuar me mjete të forta –gurë nga 4-5 persona të dyshuar të panjohur të cilët janë larguar në drejtim të panjohur. Nuk raportohet për të lënduar përveç që është dëmtuar vetura zyrtare ndërsa rasti në procedurë hetimore.