Të shtunën mbrëma, persona të panjohur e kanë thyer shtëpinë e policit hero, Izet Demaj, në Vrellë të Istogut.
Ende pa u mbushur një vit nga rënia në detyrë e policit, hajnat ia thyen shtëpinë, duke ia bërë edhe më të rëndë familjes së heroit.
Policia e Kosovës me të marrë informatën për vjedhje ka dalë në vendin e ngjarjes dhe ka nisur hetimet përkitazi me rastin.
Burimet brenda Policisë së Kosovës kanë thënë se hajnat kanë arritur të vidhnin një pistoletë me leje të cilën e posedonte bashkëshortja e policit.
Viktima në polici ka deklaruar se derisa nuk ndodhej në shtëpi, të shtunën midis orës 20:20-22:00, persona të panjohur pasi kanë hyrë me forcë në shtëpinë e saj, kanë demoluar atë dhe kanë vjedhur një pistoletë- të cilën ajo e kishte me leje.
Hajnat janë larguar nga vendi i ngjarjes në drejtim të panjohur, ndërsa njësitet përkatëse të Policisë së Kosovës janë duke e hetuar rastin.
Lidhur me rastin është informuar edhe Prokurori i shtetit, ndërsa deri sot nuk është raportuar për persona të arrestuar.
