Haradinaj: Turp u qoftë atyre që po e ndalojnë ndërtimin e rrugës Deçan-Plavë

Kryetari i AAK-së, Ramush Haradinaj, ka adresuar kritika karshi ekzekutivit se e kanë ndërprerë buxhetin për ndërtimin e rrugës Deçan-Plavë. Ai thotë se duhet t’u vijë turp atyre që e ndërprenë këtë buxhet për ndërtim të kësaj rruge.

Haradinaj apeloi te Qeveria e Kosovës që të mos shkelje për të cilat mund t’i mallkoj populli.

“Po ju tregoj një detaj që më ka bo përshtypje e kom pyet kryetarin a i sollët kodrave tha jo i dërguam ka Vermoshi, me këta po dua me thënë që misioni ynë i luftëtarëve i lirisë e i afrimit nuk po them ende i bashkimit krejt, shkon më përpara me rrugën për Plavë, dhe në ditën e sodit po ju them marrë ju koftë të gjithë atyre që ia heqin paret kësaj rruge e që se lënë me kryer këtë rrugë në kohë se kanë mundur dje me ardhur drejt se kjo është rrugë e tyre për të cilën kanë ra për liri. Ju bëjë apel atyre që i marrin vendimet në emër të këtij populli mos të bëjnë shkelje të tilla, ka shkelje që lejohen ka shkelje që i mallkon populli,” tha ai ndërsa mori pjesë në rivarrimin e dëshmorëve Besart Kadrijaj dhe Shkëlzen Berisha në Kompleksin Memorial në Gllogjan.

Në këtë ceremoni të rivarrimit të dy dëshmorëve të UÇK-së, ish-komandanti i Zonës Operative të Dukagjinit, tha se më në fund trupat e këtyre djemve të rënë për liri po bashkohen me bashkudhëtarët e rënë për liri.

“Është një ditë ndryshe për shkak se edhe pas kaq vitesh po bashkohem ende duke e kryer obligimin ndaj të rënëve për liri, në këtë rast rivarrosjen të bashkudhëtarëve tonë të cilët kanë ra heroikisht në tre kufirin shqiptaro-shqiptaro-shqiptar po ashtu edhe që kanë pushu deri sot në një vendbanim të hershëm shqiptar në Vuthaj, falënderojmë për nderimin që kanë bë malësorët tonë atje,” shton ai.

Ndërsa, kryetari i komunës së Deçanit ,Bashkim Ramosaj thotë se rivarrimi i këtyre dëshmorëve i cili i ribashkoi pas kaq shumë vite ishte i përcjell me shumë sfida deri te arritja e qëllimit.

Nil Selman Kadriaj, babai i dëshmorit, Besart Kadriaj, në rivarrosjen e djalit të tij tregon që ndihet më i lehtësuar sot, pasi nga tash e tutje eshtrat e djalit të tij do pushojnë në Gllogjan. Ai tregon për vështirësitë që i kanë kaluar në këto 23 vite për të vizituar varret e bijve të tyre që ndodheshin andej kufirit.

Në ndërkohë ai shton se si familje e kanë parë më të arsyeshme t’i sjellin më afër, si dhe në vendin ku kanë qenë do ta dërgojnë një pllakë që të jetë si përkujtim.

Trupat e dëshmorëve të kombit, Besart Kadriaj dhe Shkëlzen Berisha të cilët më 14 gusht 1998 kishin rënë në trekufirin Kosovë-Mal i Zi-Shqipëri tash e 23 vite kishin pushuar në Vuthaj të Gucisë./ KosovaPress