Përfaqësuesit e aktorëve të filmit “Don’t Worry Darling”, Harry Styles dhe Chris Pine, e kanë mohuar lajmin që Styles e ka pështyrë kolegun e tij Pine, gjatë premierës së filmit të tyre në Venecie.
Të martën mbrëma (6 shtator) mediat sociale u pushtuan nga ky lajm, pasi një gazetar sugjeroi se në një video që po qarkullon online, Harry duket duke pështyrë në drejtim të Chrisit, teksa ulet në karrigen e tij.
Sipas gazetës “The Guardian”, një burim afër këngëtarit britanik të shndërruar në aktor deklaroi se kjo gjë nuk është aspak e vërtetë.
Edhe zëdhënësi i yllit hollywoodian, Pine, u pajtua me këtë konstatim duke e quajtur atë një lajm qesharak.
someone needs to begin a full fledged investigation into what happened on that don’t worry darling set… wdym harry styles spitting on chris pine on NATIONAL TELEVISION? pic.twitter.com/jpow9JT8pk
— ceo of kory (@korysverse) September 6, 2022
“Ky është një lajm qesharak, tërësisht i fabrikuar dhe rezultat i një iluzioni të çuditshëm online që është mashtrues dhe lejon të bëhen spekulime të çmendura për dy aktorët. Këta burra kanë shumë respekt për njëri-tjetrin dhe spekulimet janë veçse një përpjekje flagrante për të krijuar dramë, e cila thjesht nuk ekziston”.
Videon ku Styles duket sikur e pështynë Pinein, i cili në sallën ku shfaqej filmi i tyre ishte i ulur mes tij dhe regjisores, Olivia Wilde, e cila njëkohësisht është e dashura e Stylesit në jetën reale, është shpërndarë nga portale të shumta. Dhe ajo që i bëri njerëzit të mendojnë se ky incident kishte ndodhur me të vërtetë, është reagimi i Chrisit i cili duket i neveritur në ato momente, raporton BBC.
Filmi është përcjell nga një varg polemikash pasi protagonistja e tij, Florence Pugh, e cila në ekran e luan rolin e të dashurës së personazhit të Harry Stylesit, parakaloi mbi qilimin e kuq të shtruar në kuadër të Festivalit të filmit në Venecie, por mungoi dukshëm në konferencën për shtyp.
Kur u pyet nga një gazetar në lidhje me përçarjet mes aktorëve të filmit, Olivia Wilde, tha se ajo nuk pranon të kontribuojë në “thashethemet e pafundme të tabloideve”, dhe në vend të kësaj zgjodhi ta lavdërojë Flerencen dhe aftësitë e saj në aktrim.
“Don’t Worry Darling”, i cili lansohet nëpër kinematë britanike në fund të muajit shtator, ka marrë vlerësime të përziera nga kritikët e filmit, disa prej së cilëve e quajtën një tregim jo bindës i periferisë distopike.
