Vizita e mbrëmshme e presidentit Hashim Thaçi dhe e ish-kryeministrit Ramush Haradinaj te deputeti Haxhi Shala ka qenë vendimtare në sigurimin e votës së 61-të për formimin e Qeverisë së udhëhequr nga Avdullah Hoti.
Kjo vizitë e kreut të shtetit, sipas deputetit të Nismës Socialdemokrate, ka bërë që të ndryshojë qëndrimin e tij kundër Qeverisë Hoti.
Kontributin e tyre, në ndryshimin e votës së Shalës, nuk e mohuan as kreu i shtetit, e as kryetari i AAK-së, raporton KOHA.
Thaçi tha se këshilla u jep të gjithë të interesuarve e Haradinaj thotë se i tregoi Shalës së si do të vepronte ai po të ishte deputet .
Por, për Fatmir Limajn e Nismës, më e rëndësishme është se Qeveria Hoti në fund ka marrë mbështetjen e të gjithë deputetëve të partisë së tij.
Ndaj deklaratës së deputetit Haxhi Shala, lidhur me ndikimin e vizitës së Thaçit e Haradinajt në ndryshimin e votës së tij, ka reaguar shoqëria civile.
“KDI shpreh shqetësim lidhur me deklaratën publike të deputetit Haxhi Shala në seancën e sotme për ndryshimin e qëndrimit të tij për votimin e Qeverisë Hoti. Deputeti Shala deklaroi që “pas vizitës së mbrëmshme në familjen time të presidentit dhe ish- kryeministrit Haradinaj kam ndërruar mendje dhe vota ime do të jetë pro për këta dy persona dhe pro Qeverisë Hoti”, shkruhet në reagimin e KDI-së.
“Rikujtojmë që Kushtetuta e Kosovës (neni 70, pika 1) lidhur me mandatin e deputetëve thotë që ‘deputetët e Kuvendit janë përfaqësues të popullit dhe nuk i nënshtrohen asnjë mandati detyrues’”, shkruhet në vazhdim.
Ndërhyrjen në votën e Haxhi Shalës e ka quajtur të papranueshme edhe raportuesja për Kosovën në Parlamentin Evropian.
Viola von Cramon tha se ky është sinjal jashtëzakonisht i keq dhe tregon se roli i Parlamentit, që garantohet me Kushtetutë, është i minuar.
