Ndonëse sot në media është raportuar dhe emri i tij është lakuar si i propozuar nga Lidhja Demokratike e Kosovës, për ministër të Shëndetësisë në Qeverinë e re, kjo çështje ende nuk është diskutuar me protagonistin kryesor.
Bëhet fjalë për infektologun e njohur të cilin tashmë e shohim çdo ditë në media duke folur për pandeminë e koronavirusit, Valbon Krasniqin, shkruan Insajderi.
Në një bisedë telefonike për Insajderin, Krasniqi ka thënë se askush nga LDK-ja nuk ka biseduar me të për këtë çështje.
Madje, thotë se këtë e ka kuptuar përmes mediave, por se për këtë nuk është në dijeni.
“Jo, nuk ka biseduar askush me mua për këtë punë ende. Para gjysmë ore e mora vesh edhe unë. Bile në Klinikë isha duke dhënë një intervistë për një medium edhe disa kolegë erdhën dhe më njoftuan. Pra mua askush nuk më ka ftuar dhe nuk ka biseduar për këtë punë”, ka thënë Krasniqi për Insajderin.
Krasniqi, ka deklaruar se ndoshta emri i tij për ministër të ardhshëm të shëndetësisë është diksutuar brenda strukturave të LDK-së, por se ky nuk ka pasur asnjë bisedë me ta.
“Ata munden me bisedu këtë çështje në strukturat e veta, por me mua nuk kanë biseduar”, ka thënë Krasniqi.
Krasniqi gjatë zgjedhjeve të vitit 2017, ai ishte kandidat i LDK-së për deputet.
Sidoqoftë, përvec Shëndetësisë, LDK-ja do të marrë edhe 5 ministri. Lumir Abdixhiku, Agim Veliu, Vlora Dumoshi, Lutfi Zharku e Armend Zemaj janë propozuar për ministra.
