Insiston Famullia e Shën Mihillit në Doblibarë:Dje Sabit Geci është konvertuar dhe ka ndërruar emrin

Ditën e sotme, Famullia e Shën Mihillit në Doblibarë, përmes një njoftimi në Facebook ka njoftuar se ish-komandanti i UÇK-së, Sabit Geci, është konvertuar në fenë katolike.

Në postim thuhet se Geci është pagëzuar dhe ka ndërruar emrin nga Sabit në Kastriot.

Pas njoftimit të tyre, Geci në një prononcim për Gazetën Express e ka mohuar këtë, dhe është shprehur se është vetëm një shaka.

Për 28 Nëntor, Geci tha se e ka vizituar kishën në Llapushnik të Drenasit dhe një xhami në Podujevë, imamin e së cilës tha se e ka mik.

“Unë nuk jam fetar fare, hiç ,hiç. Bile qeta me mjekrra i urrej, shumë i urrej. Me dalë ai me e quejt flamurin leckë, me dalë ai tjetri me thanë bën me marrë çikën a axhës për grua, s’sështë haram, kjo është tmerr o vëlla”, tha ai.

Ish-anëtari i Shtabit të Përgjithshëm të UÇK-së pranoi se do të donte ta kishte një emër shqip dhe se këtë ua ka thënë edhe të pranishmëve në kishë, por tha se s’ka arsye ta ndërrojë tash.

“Jo more vëlla, emrin as s’e ndërroj, se unë nuk jam fetar fare. Unë nuk kam nevojë me e ndërru fenë kur nuk jam fetar. Unë emrin s’e ndërroj me ma dhanë botën, se e kam emrin që ma kanë lanë baba e nana”, tha ai.

Ai ka pranuar se do të donte ta kishte një emër shqip dhe se këtë ua ka thënë edhe të pranishmëve në kishë, por tha se s’ka arsye ta ndërrojë emrin tash.

Pas kësaj, Paparaci ka kontaktuar me Famullinë, të cilët përmes telefonit kanë demantuar fjalët e Gecit.

Siç është paraqitur në telefon, prifti është shprehur se dje Sabit Geci është konvertuar dhe ka ndërruar emrin.

“Po është e vërtetë që dje me datë 28.11.2023, Sabit Geci është konvertuar në kishën e Llapushnikut”, janë shprehur nga Famullia

Poashtu, në fotografinë e publikuar nga Famullia, vërehet se Geci ka rreth qafës një shall, ku shkruan “Pagëzimi”.