Irani kërkoi ndihmë nga SHBA, por nuk e mori!

Shtetet e Bashkuara kanë deklaruar të hënën se nuk kishin qenë në gjendje, kryesisht për arsye logjistike, t’i përgjigjeshin kërkesës iraniane për ndihmë pas rrëzimit të helikopterit të dielën (19 Maj) ku humbi jetën presidenti Ebrahim Raisi, ndërsa Uashingtoni i shprehu ngushëllimet e tij.

Kërkesa e rrallë nga Irani, që i konsideron Shtetet e Bashkuara dhe Izraelin si kundërshtarët e tij kryesorë, u zbulua nga Departamenti i Shtetit në një konferencë shtypi.

“Na u kërkua ndihmë nga qeveria iraniane. Ne u bëmë të qartë atyre se do të ofronim ndihmë, siç do të bënim në përgjigje të çdo kërkese nga një qeveri e huaj në këtë lloj situate”, u tha gazetarëve zëdhënësi Matthew Miller.

“Por, kryesisht për arsye logjistike, ne nuk ishim në gjendje ta ofronim atë ndihmë”, tha Miller pa dhënë detaje.

Mbetjet e djegura të helikopterit që u rrëzua të dielën, ku humbi jetën Raisi, Ministri i Jashtëm Hossein Amirabdollahian dhe gjashtë pasagjerë të tjerë e anëtarë të ekuipazhit, u gjetën të hënën nga kërkimet me dron.

Irani ende nuk ka dhënë asnjë deklaratë zyrtare për shkakun e rrëzimit të helikopterit Bell 212 të prodhimit amerikan në malet pranë kufirit me Azerbajxhanin.

I pyetur nëse ishte i shqetësuar se Teherani mund të fajësonte Uashingtonin, sekretari amerikan i Mbrojtjes Lloyd Austin tha: “Shtetet e Bashkuara nuk kishin asnjë rol në atë aksident ajror”.

“Nuk mund të spekuloj se cili mund të ketë qenë shkaku”, shtoi ai.

Aksidenti ajror vjen në një kohë të mosmarrëveshjeve në rritje brenda Iranit mbi një sërë krizash politike, sociale dhe ekonomike. Sundimtarët klerikë të Iranit përballen me presion ndërkombëtar mbi programin e diskutueshëm bërthamor të Teheranit dhe thellimin e lidhjeve të tij ushtarake me Rusinë gjatë luftës në Ukrainë.