Ish-kryeministri britanik: Putin më kërcënoi me sulme

“Për një sulm raketor na mjafton një minutë”. Kjo fjali, sipas ish-kryeministrit britanik Boris Johnson, i është thënë gjatë një bisede plot tension nga presidenti rus Vladimir Putin në shkurtin e vitit të kaluar, pak ditë para se kreu i Kremlinit të urdhëronte pushtimin e Ukrainës, nën petkun e “Operacionit Special”.    

Në një intervistë për BBC, Johnson kujtoi që gjatë asaj telefonate kishte paralajmëruar liderin rus për pasojat e jashtëzakonshme që një konflikt në Ukrainë do të kishte në Europë, si dhe për reagimin  e pashmangshëm të komunitetit ndërkombëtar që do të izolonte Moskën ndërkombëtarisht, me sanksione që do të rrënonin ekonominë e saj.

Sipas britanikut, të gjithë këto masa nuk duket sikur i bënin përshtypje së tepërmi Putin, i cili pyeste më së shumti nëse Ukraina do të anëtarësohej së shpejti në NATO.

Boris Johnsson morri postin e kryeministrit britanik në korrikun e vitit 2019, duke e lënë rezidencë në Downing Street në shtatorin e vitit 2022.

Johnson ishte një nga liderët perëndimorë me përkrahës me presidentin ukrainas Volodymyr  Zelensky, të cilin e ka vizituar dy herë në Kiev gjatë konfliktit, me Londrën që është një nga kontribuuesit më të mëdhenj për ushtrinë e Kievit.