Ish-kryeministri serb: Vuçiç është një kukull e Putinit, me politikat e tij nuk ka kurrë anëtarësim në BE

Aleksandër Vuçiç është një kukull në duart ruse, ai është një i nënshtruar ndaj vullnetit të presidentit rus, Vladimir Putin.

I këtij mendimi është, “, Zoran Zhivkoviç, ish-kryeministri i Serbisë pas vrasjes së Zoran Gjingjiç dhe kishte shërbyer nga viti 2003 deri në vitin 2004.

Ai në një intervistë për italianen “Ilfattoquotidiano.it” shprehet se ndikimi rus është i dukshëm në “regjimin serb”.

Për të, Vuçiç në këtë mënyrë po e çon vendin në kaos të nxitur nga nacionalizmi i brendshëm.

“Një situatë e cila, rrezikon hyrjen e Beogradit në Bashkimin Evropian, edhe në kushtet e një situate shumë delikate në marrëdhëniet me Kosovën”, thotë ish-kryeministri serb.

Sa i takon kësaj të fundit, ai ende vijon ta konsiderojë si “humbje” edhe pse pranon se lufta e 1999-s lindi nga politikat e sëmura dhe të pakuptimta të ish-diktatorit serb, Sllobodan Millosheviç.

Sipas Zhivkoviç, e vetmja zgjidhje që do të garantonte paqen e përjetshme ndërmjet serbëve dhe shqiptarëve në atë territor është “ndarja e veriut të Kosovës”.

Në vijim të intervistës për çështjen e Kosovës, ai thekson se një tjetër dëshmi e gënjeshtrave të Aleksandër Vuçiçit është edhe vendimi i shumë serbëve për dorëheqje nga institucionet e Kosovës.

“Ai me dekada ka thënë se nuk e njeh pavarësinë e Kosovës, por përfaqësuesit e partisë së tij janë të pranishëm në vetë institucionet zyrtare të Kosovës. Ata deri dje kanë mbajtur rolin e ministrave dhe deputetëve dhe kanë qenë të pranishëm edhe në shumë poste të tjera shtetërore”.

“Braktisja e këtyre institucioneve është një lëvizje propagandistike që duhet të konfirmojë përrallën e ‘patriotizmit’ të Vuçiçit dhe pengut të tij”.

Kur flasim për gënjeshtrat, një tjetër është edhe ajo e “shpërthimit të një lufte të re”.

“Është një shfaqje tjetër e Vuçiçit me të cilën ai përpiqet të bindë qytetarët e Serbisë se jemi të kërcënuar, por se do të na mbrojë dhe do të na shpëtojë nga çdo e keqe. Nuk do të ketë luftë, ai e di se do të ishte një konflikt i armatosur jo kundër Kosovës, por kundër NATO-s dhe këtu humbja është e pashmangshme”.

Kështu Zhivkoviç shprehet se, kjo nuk do t’i sjellë asgjë të mirë Serbisë dhe as serbëve në Kosovë.

Sa i takon të qeverisjes serbe, ish-kryeministri i atij vendi ravijëzon se zgjedhjet parlamentare janë një farsë me mashtrime elektorale dhe prapambetje.

Ai vijon me akuza ndaj qeverisë duke e cilësuar si një konglomerat apologjetësh të Vuçiçit pa karakter apo aftësi të nevojshme.

“Gjyqësori është nën kontrollin e tij, larg të qenit i pavarur dhe kjo vlen edhe për institucionet e tjera shtetërore. Kontrolli i regjimit mbi median është mbizotërues. Mediat me gënjeshtrat e tyre ndihmojnë diktatorin të gënjejë dhe për pasojë të mashtrojë qytetarët”.

E me gjithë këto akuza, Zhivkoviç thotë se Serbia nuk do të hyjë kurrë në BE në këtë mënyrë.