Grupi i militantëve të Shtetit Islamik konfirmoi vdekjen e liderit Abu Bakr al-Baghdadi dhe caktoi pasuesin e tij. Përmes një mesazhi audio në platformën Telegram, ISIS njofton se drejtuesi i ri i “Kalifatit” do të jetë Abu Ibrahim al-Hashemi al-Qurayshi.
Forcat special amerikane e lokalizuan javën e kaluar Al Baghdadin në veriperëndim të Sirisë dhe sulmuan vendin ku ai strehohej. Lideri i ISIS u fsheh në një tunel dhe më pas hodhi veten në erë pasi e pa se nuk mund të shpëtonte. Baghdadi u shpall drejtuesi i grupit ekstremist në vitin 2014 kur ISIS mori kontrollin e sipërfaqeve të mëdha në Irak dhe Siri dhe imponoi regjimin e tij ndaj civilëve.
Në mesazhin audio, ISIS konfirmoi dhe vdekjen e zëdhënësit Abu al-Hasan al-Muhajir, i cili u vra në një tjetër aksion të trupave amerikane dhe atyre kurde në 27 tetor. Zëdhënësi i ri, Abu Hamza al-Qurayshi iu bëri thirrje myslimanëve të betohen për aleancë me Abu Ibrahim al-Hashemi.
