Kryeministri i Izraelit, Benjamin Netanyahu ka gati planin dhe datën për fillimin e sulmeve në Rafah, qyteti jugor i Gazës, i cili besohet se strehon anëtar të Hamasit, por edhe vendi ku po strehohen qindra palestinezë të zhvendosur. Netanyahu nuk e bëri publike datën e fillimit të sulmit, por deklarata erdhi menjëherë pas përfundimeve të dështuara të negociatave në Kajro, midis delegacioneve të Izraelit dhe Hamasit për arritjen e një armëpushimi.
“Sot mora një raport të detajuar mbi bisedimet në Kajro, ne po punojmë vazhdimisht për të arritur qëllimet tona, para së gjithash lirimin e të gjithë pengjeve tona dhe arritjen e një fitoreje të plotë ndaj Hamasit. Kjo fitore kërkon hyrjen në Rafah dhe eliminimin e batalionet terroriste atje. Do të ndodhë, ka një datë”, tha Netanyahu.
Dështimin e bisedimeve në Kajro e ka konfirmuar një zyrtar i Hamasit, cili tha se nuk ishte bërë përparim në takim për një armëpushim në luftën e Gazës. Nga ana e saj, SHBA ka shtuar presionet për arritjen e një armëpushimi të përkohshëm. Plani i SHBA, citon Reuters, përfshin përpjekje për një armëpushim 6 javor në këmbim të lirimit të 40 pengjeve. “Propozimi për lirimin e pengjeve i është dorëzuar Hamasit, tani ne presim përgjigjen e tyre dhe mund të marrë pak kohë”.
Këtë e tha zëdhënësi i Këshillit të Sigurisë Kombëtare Amerikane, John Kirby, në një konferencë me një grup gazetarësh. Ndërkohë Presidenca e Këshillit të Sigurimit të Kombeve të Bashkuara referoi kërkesën e Autoritetit Palestinez për t’u bërë anëtar i plotë i organizmit botëror në komitetin për pranimin e anëtarëve të rinj. Ambasadorja e Maltës në OKB Vanessa Frazier propozoi që komiteti të mblidhej për të shqyrtuar aplikimin, duke shtuar se diskutimi duhet të bëhet këtë muaj.
“Ne shpresojmë sinqerisht pas 12 vjetësh që kur kemi ndryshuar statusin tonë në një shtet vëzhgues, që Këshilli i Sigurimit do të ngrihet në zbatimin e konsensusit global për zgjidhjen e dy shteteve dukepranuar shtetin e Palestinës për anëtarësim të plotë”, u shpreh Riyad Mansour, i dërguari palestinez në OKB.
Malta mban presidencën e Këshillit të Sigurimit për muajin prill.
