Izraeli e zbatoi kërcënimin e tij kundër Sirisë të premten, duke bombarduar zonën përreth pallatit presidencial në Damask, pasi udhëheqësi i pakicës druze, i mbrojtur nga autoritetet izraelite, akuzoi Qeverinë e presidentit të ri sirian, Ahmad al-Sharaa, për “gjenocid”.
Udhëheqësi fetar më me ndikim Druze në Siri, Sheikh Hikmat al-Hajrin, denoncoi të enjten në mbrëmje një “fushatë të pajustifikuar gjenocidale” që synonte “civilët” në komunitetin e tij, pas përleshjeve sektare në fillim të kësaj jave, që lanë më shumë se 100 të vdekur, sipas një OJQ-je.
Udhëheqësi fetar Druze bëri thirrje më pas për “ndërhyrje të menjëhershme nga forcat ndërkombëtare” dhe Izraeli – një fqinj i Sirisë me të cilën është në luftë dhe që ka mbajtur anën e Druzëve – kërcënoi menjëherë të përgjigjej “me forcë” nëse Damasku nuk e mbronte këtë pakicë fetare.
Disa orë më vonë, në agim të së premtes, “aeroplanët luftarakë goditën zonën përreth pallatit presidencial” në Damask, njoftoi Ushtria izraelite në Telegram.
“Ky është një mesazh i qartë i dërguar regjimit sirian. Ne nuk do të lejojmë që forcat (siriane) të dërgohen në jug të Damaskut ose të kërcënojnë komunitetin druz në asnjë mënyrë”, thanë kryeministri Benjamin Netanyahu dhe ministri i Mbrojtjes Israel Katz, në një deklaratë të botuar në anglisht nga gazeta Times of Israel.
Përleshjet pranë dhe në jug të Damaskut midis luftëtarëve druzë dhe grupeve të armatosura të lidhura me regjimin sunit të Presidentit Ahmad al-Shareh ilustrojnë paqëndrueshmërinë e vazhdueshme në Siri, gati pesë muaj pas rrëzimit të paraardhësit të tij Bashar al-Assad, i cili vinte nga pakica alevite.
“Ne nuk i besojmë më një entiteti që pretendon të jetë qeveri. Një qeveri nuk i vret njerëzit e saj duke përdorur milicitë e veta ekstremiste dhe pastaj, pas masakrave, duke pretenduar se ata janë elementë të pakontrolluar”, denoncoi sheiku Druze.
“Retorikë nxitëse”
OKB-ja u bëri thirrje “të gjitha palëve të ushtrojnë përmbajtje maksimale” dhe diplomacia amerikane denoncoi “dhunën dhe retorikën e fundit nxitëse” kundër druzëve si “të dënueshme dhe të papranueshme”.
Luftimet këtë javë në Jaramana dhe Sahnaya, ku jetojnë të krishterë dhe druzë, si dhe në Sweida, një qytet me shumicë druze, kanë rizgjuar fantazmën e masakrave që lanë më shumë se 1 mijë e 700 të vdekur në fillim të marsit, shumica dërrmuese e të cilëve anëtarë të pakicës alevite, në perëndim të vendit. Dhuna u nxit nga sulmet e militantëve pro-Assad ndaj forcave të sigurisë të qeverisë së re.
Të mërkurën, ushtria izraelite kishte goditur pranë Damaskut, si një “paralajmërim” kundër një “grupi ekstremist që po përgatitej të sulmonte popullsinë druze të qytetit Sahnaya”, sipas zotit Netanyahu.
Druzët janë një pakicë brenda Islamit Shiit. Anëtarët e saj janë të shpërndarë midis Libanit, Sirisë dhe Izraelit. “Ne jemi një pjesë e patjetërsueshme e Sirisë”, tha një zëdhënës i tubimit të autoriteteve fetare, udhëheqësve tradicionalë dhe grupeve të armatosura Druze në Sweida, duke shtuar se komuniteti refuzon “çdo ndarje” të vendit.
Luftimet në Siri u shkaktuan të hënën në mbrëmje nga një sulm i grupeve të armatosura të lidhura me qeverinë në Jaramana, pas qarkullimit në mediat sociale të një mesazhi audio që i atribuohet një Druzi dhe që konsiderohet blasfemues kundër Profetit Muhamed.
AFP nuk ishte në gjendje të verifikonte vërtetësinë e mesazhit. Autoritetet siriane kanë fajësuar elementë përtej kontrollit të tyre për provokimin e dhunës.
102 të vdekur
Sipas një raporti nga Observatori Sirian për të Drejtat e Njeriut (SOHR), këto përleshje lanë 102 të vdekur, përfshirë 30 anëtarë të forcave të sigurisë dhe luftëtarë të lidhur me to, 21 luftëtarë Druze dhe 11 civilë në Jaramana dhe Sahnaya.
Në provincën e Sweida-s, 40 luftëtarë druzë vdiqën, përfshirë 35 në një pritë, sipas OJQ-së. Në Jaramana, marrëveshjet midis përfaqësuesve të Druzëve dhe qeverisë ndihmuan në rivendosjen e qetësisë të martën në mbrëmje, ashtu si edhe të mërkurën në mbrëmje në Sahnaya, 15 km në jugperëndim të Damaskut, ku u vendosën forcat e sigurisë. Dhe qeveria siriane riafirmoi “angazhimin e saj të vendosur për të mbrojtur të gjithë përbërësit e popullit sirian, përfshirë komunitetin druz”.
Që nga rënia e Bashar al-Assad më 8 dhjetor, i rrëzuar nga një koalicion fraksionesh rebele islamike të udhëhequra nga Chareh pas më shumë se 13 vitesh luftë civile, Izraeli ka bërë gjeste të shumta hapjeje ndaj druzëve, duke kërkuar, sipas analistit të pavarur Michael Horowitz, të sigurojë aleatë në Sirinë jugore në një kohë kur e ardhmja e këtij vendi mbetet e pasigurt.
