Ushtria izraelite ka kryer një sulm ajror, duke neutralizuar komandantin e Brigadave Al-Kuds, krahun e armatosur të fraksionit të rezistencës me seli në Gaza, Xhihadi Islamik.
Nga ushtria thonë se kanë qëlluar një shtëpi në Gaza, duke pasur cak Bahaa Abu Al-Atta, që rezultoi me eliminimin e tij.
https://www.facebook.com/FMimagesAlbania/videos/465641287401101/
Ushtria thotë se sulmi “ishte miratuar nga kryeministri dhe ministri i Mbrojtjes, Benjamin Netanyahu”.
“Abu Al-Atta, praktikisht kreu shumicën e aktiviteteve të lëvizjes në Rripin e Gazës dhe ishte drejtpërdrejt i përfshirë në operacionet dhe tentativat për të sulmuar qytetarët dhe ushtrinë e Izraelit në disa mënyra”, thuhet në komunikatën e ushtrisë.
Fraksioni i rezistencës palestineze konfirmoi se është ekzekutuar Al-Atta, komandanti i pjesës veriore të Rripit të Gazës, duke u zotuar se do të hakmerret për vdekjen e tij.
“Jemi të pikëlluar për martirizimin e komandantit Abu Al-Atta dhe gruas së tij dhe ne shpallim gjendjen e gatishmërisë midis luftëtarëve tanë”, thuhet në komunikatë.
Në një deklaratë tjetër, nga Brigadat Al-Kuds thonë se kanë lëshuar raketa në jug të Izraelit si përgjigje ndaj atentatit.
Ushtria izraelite njoftoi se pas sulmit ajror, në jug të vendit janë aktivizuar sirenat e alarmit.
Në Rripin e Gazës është shpallur gjendje e jashtëzakonshme dhe procesi mësimor në shkolla u pezullua deri në njoftimin e mëtejshëm.
Korporata zyrtare izraelite e transmetimit tha se ushtria kishte përforcuar forcat e saj rreth Rripit të Gazës dhe po përgatitej për disa “skenarë sulmues dhe mbrojtës”.
