Kallas: Viti 2030, objektiv realist për integrimin e Shqipërisë

Përfaqësuesja e Lartë për Politikën e Jashtme dhe Sigurinë e Bashkimit Europian, Kaja Kallas, e cilësoi sot vitin 2030 si një objektiv realist për integrimin e Shqipërisë në Bashkimin Europian, por theksoi se ky qëllim varet nga përmbushja e reformave dhe zbatimi i tyre në praktikë.

Deklarata u bë gjatë konferencës së përbashkët për shtyp me Kryeministrin Edi Rama, në kuadër të vizitës zyrtare të Kallas në Tiranë.

“Viti 2030 është një objektiv realist, nëse të dyja palët bëjnë mirë detyrat e shtëpisë. Nuk mjafton vetëm miratimi i reformave, por është thelbësore që ato të zbatohen”, tha Kallas.

Duke iu përgjigjur interesimit të gazetarëve për rolin e reformave në drejtësi, veçanërisht ato që lidhen me luftën kundër korrupsionit në nivelet e larta, Kallas vuri në dukje se sundimi i ligjit është jetik, jo vetëm për integrimin europian, por edhe për zhvillimin ekonomik të vendit.

“Shteti i së drejtës është një nga themelet e Bashkimit Europian, por edhe themeli i mirëqenies së një vendi. Nëse investitorët kanë besim te sistemi juaj ligjor, ata do të kenë besim të investojnë në ekonominë tuaj”, theksoi ajo.