Policia e Kosovës në bashkëpunim me Doganën kanë kapur rreth 9 kilogramë substancë narkotike, që dyshohet të jetë kokainë.
Sipas njoftimit, droga është zënë në pikëkalimin kufitar në Vërmicë, teksa janë arrestuar dy persona që po udhëtonin me një veturë Peugeot me targa të Shqipërisë.
“Si rezultat i punës dhe bashkëpunimit të autoriteteve të përfshira në MIK (menaxhimi i integruar i kufirit), mbrëmë (e martë) gjatë kontrolleve policore dhe doganore është parandaluar kontrabanda e rreth nëntë (9) kg, substancë narkotike që dyshohen të jetë e llojit kokainë, si dhe janë arrestuar dy persona. Rreth orës 21:45 në pikë kalimin kufitar Vërmicë ka arritur një automjet (pezho) me targa të republikës së Shqipërisë, në të cilën gjendeshin dy persona meshkuj me shtetësi të Shqipërisë, ku pas dyshimeve të ngritura vetura është selektuar për kontrolle. Vetura është dërguar në vijën e dytë të kontrollit së bashku me Doganën e Kosovës, gjithashtu në bashkëpunim me autoritetet kufitare të Shqipërisë në bazë të dyshimeve të bazuara automjeti është dërguar për skanim, imazhet e skanimit kanë dhënë indikacione për hapësirë të fshehur post fabrikat nën ulësen e pasme”, thuhet në njoftim.
Pas hapjes së ulëses së pasme është gjetur bunkeri, ku ishin fshehur 9 paketime me substancë narkotike, me sasi 8.874 kg.
“Lidhur me rastin janë njoftuar njësitet relevante policore si dhe prokurori i rastit, me vendim të të cilit personat e dyshuar janë dërguar në mbajtje”, thuhet në njoftim.
