Kenia e njeh zyrtarisht Kosovën

Republika e Kenias, të mërkurën e 26 marsit, e ka njohur Republikën e Kosovës si shtet të pavarur dhe sovran.

Kështu të paktën ka bërë të ditur ish-ministri i Punëve të Jashtme të Kosovës, Behgjet Pacolli, nëpërmjet një postimi në platformën sociale, Facebook, ku ka postuar edhe një fotografi nga rasti solemn së bashku me presidentin e Kenias, William Ruto.

“Kjo njohje nuk është thjesht një deklaratë – është një fitore e madhe për shtetin e Kosovës, është zëri i lirisë sonë që dëgjohet thellë në zemrën e Afrikës! Sot, flamuri ynë i shtetit ngrihet lart me krenari në Nairobi, dhe kjo është një dëshmi se Kosova ecën përpara, fuqishëm dhe me dinjitet kur punohet dhe ka vullnet për të”, ka shkruar ai në platformën sociale, Facebook.

Kjo njohje, sipas Pacollit, nuk erdhi rastësisht.

“Ajo është fryt i një pune të gjatë, të palodhur, me përkushtim e sakrificë. Që nga viti 2009, unë personalisht kam lobuar dhe kam biseduar me autoritetet keniane për ta bërë këtë ditë realitet. Kam shkuar derë më derë, zyrë më zyrë, me vetëm një qëllim – të bëj të njohur zërin dhe të drejtën e popullit të Kosovës për liri, pavarësi dhe sovranitet”.