Shtëpia e Bardhë ka paralajmëruar se Kina mund t’i përgjigjet me provokime ushtarake, vizitës së paramenduar të Nancy Pelosit në Tajvan.
Kjo mund të përfshijë gjuajtjen e raketave pranë Tajvanit, ose aktivitete ajrore ose detare në shkallë të gjerë, tha zëdhënësi John Kirby, raportoi BBC të martën.
Pelosi, kryetare e Dhomës së Përfaqësuesve të SHBA-së, po qëndron në Malajzi të martën në kuadër të turneut të saj saj në Azi.
Mediat tajvaneze dhe amerikane thonë se ajo ka në plan ta vizitojë Taipei të martën mbrëma, por nuk ka asnjë konfirmim zyrtar.
Megjithatë, duke iu përgjigjur pyetjeve të gazetarëve të martën, kryeministrja e Tajvanit, Su Tseng-chang tha se ishulli “mirëpret ngrohtësisht” çdo mysafir të huaj.
Tajvani është një ishull i vetëqeverisur, por i pretenduar nga Kina, e cila e sheh atë si një provincë të shkëputur. Pekini ka paralajmëruar për “pasoja të rënda” nëse Pelosi e viziton atë.
Ndërsa SHBA-ja e ruan atë që e quan një “marrëdhënie të fortë, jozyrtare” me Tajvanin, ajo ka marrëdhënie diplomatike zyrtare me Kinën dhe jo me Tajvanin.
Të hënën, i dërguari i Kinës në Kombet e Bashkuara Zhang Jun paralajmëroi se vizita do të minonte marrëdhëniet midis Pekinit dhe Washingtonit. Ministria e Jashtme e Kinës tha gjithashtu se një vizitë e Pelosit do të “përbënte një ndërhyrje të rëndë në punët e brendshme të Kinës” duke shtuar se “Ata që luajnë me zjarrin do të humbasin prej tij”.
Pelosi fillimisht kishte planifikuar të vizitonte Tajvanin në prill, por e shtyu udhëtimin pasi rezultoi pozitive për COVID-19.
