Statuja e Jezu Krishtit Shpëtimtarit u hoq nga katedralja armene në Lviv dhe u dërgua në një bunker, për ta mbrojtur atë nga bombardimet ruse, shkroi në profilin e tij në “Twitter” Tim Le Berre, i cili është përgjegjës për ruajtjen e muzeve ushtarakë për ushtrinë franceze.
“Herën e fundit që ai u nxor jashtë, ishte gjatë Luftës së Dytë Botërore”, shpjegoi Le Berre, i specializuar në mbrojtjen e trashëgimisë artistike në zonat me konflikt të armatosur.
Ai postoi foton e fotografit të pavarur portugez André Luís Alves, “imazh dramatik dhe shumë i shpërndarë në rrjetet sociale”, të cilin dikush e krahasoi me “Deponimin” e Caravaggio-s.
“Ne po i mbështjellim skulpturat me fletë të papërshkueshme nga zjarri, lesh xhami, alumin të veçantë dhe më pas i vendosim në thasë”, konfirmoi Lilia Onyschenko, drejtore e Departamentit për mbrojtjen e trashëgimisë historike në Lviv.
“Kjo nuk i shpëton statujat nëse goditen drejtpërdrejt, por nëse ka një valë të fuqishme goditëse ato nuk do të thyhen në një mijë pjesë. Sidoqoftë, nuk është gjithmonë e mundur të çmontohen këto monumente, sepse disa janë shumë të mëdha”.
Katedralja armene në Lviv konsiderohet si një nga “kishat më të vjetra dhe më luksoze në Evropën Perëndimore”, tha politologu Gagik Hambaryan, i cili gjithashtu shpërndau imazhin në rrjetin “Facebook”, për faqen armene “Aravot”.
Statuja e Krishtit nderohet jo vetëm nga besimtarët në Kishën Apostolike armene, shtoi ai, por edhe nga të krishterët e tjerë.
Krishti, shpjegon “EuroMaidan Press”, është pjesë e një ikonostasi mesjetar, muri ndarës i dekoruar që ndan neosin e kishave katolike dhe ortodokse lindore nga presbiteri ku kremtohet Eukaristia, e cila i mbijetoi Luftës së Dytë Botërore.
