Në një debat televiziv për Russia 1, një rus ka folur haptazi për humbjen e mundshme të Rusisë në luftë, duke e quajtur këtë gjë si fillimin e fundit të shtetit rus, shkruan Gazeta Metro.

Ai me këtë fjalim e parashikon fundin e regjimit të Putin nëse Rusia s’mund të dalë fituese në Ukrainë. Ky lloj fjalimi është tejet i rrallë në kanalet që kontrollohen nga vetë shteti, për qëllime propagandistike.

“Çfarëdo marrëveshje që nënshkruan Rusia me regjimin aktual të Ukrainës do të jetë humbje e Rusisë. Humbja përfundimtare dhe e plotë. Në sytë e popullit rus, në sytë e ushtrisë ruse dhe në sytë e të gjithë botës”, tha rusi.

“Dhe pastaj mbështetja nga India, Kina dhe bota arabe do të avullohet.”

Më tej, shtoi: “Kur Rusia i dërgoi ultimatum SHBA’së, ajo i dërgoi ultimatum vetes së saj. Rusia s’mund të humbë.”

“Kjo do të thoshte se Rusia s’ka fuqi të përballet me kë? Me Ukrainën? Me Zelenskyn? Marrëveshja me Ukrainën do të ishte fillimi i fundit të shtetit rus”, paralajmëroi rusi në këtë debat.

“Sepse nëse dështon në Ukrainë, pse e kërcënon NATO’n? Pse e kërcënon SHBA’në? Ti s’mund të përballeshe me Zelenskyn, pra çka je ti?”, përfundoi ai. Rusia dhe Ukraina përndryshe do të zhvillojnë edhe një raund tjetër të negociatave këtë javë, në tentim për të arritur një marrëveshje paqeje.

Lexo më shumë