Kurti i quan partitë e tjera “struktura hierarkike e patriarkale të prapambetura

Kryeministri në detyrë, Albin Kurti, ka kritikuar deputetë të partive që në legjislaturën e kaluar ishin në opozitë, për mosvotimin e kandidates së VV-së, Albulena Haxhiu, për kryetare të Kuvendit të Kosovës.

Ai e ka quajtur mosvotimin e Haxhiut jo vetëm luftë politike por edhe gjinore nga partitë e tjera.

“Kjo situatë gjithashtu reflekton përballjen me struktura hierarkike e patriarkale të prapambetura. Lufta kundër kryetares së GVV, Albulena Haxhiu nuk është vetëm përplasje politike apo partiake, por edhe përballje gjinore”, theksoi ai.

Ai ka thënë se ata deputetë që në të kaluarën votuan “Zajednicën”, Gjykatën Speciale e demarkacionin, sot nuk po e votojnë Haxhiun – edhe pse, siç ka thënë Kurti, Haxhiu është gruaja më e votuar nga populli.

“Gruaja të cilën më së shumti e ka votuar populli në zgjedhjet e 9 shkurtit është Albulena Haxhiu. Në vend se ta respektojnë popullin e luftojnë Albulenën. Dhe kush e bën këtë? E bëjnë edhe 10 deputetë që sot janë në opozitë dhe e kanë votuar ‘Zajednicën’ me 27 qershor 2013; po ashtu 10 deputetë që sot janë në opozitë e kanë votuar amnistimin e kriminelëve serbë në veri me 11 korrik 2013; më tej, 7 deputetë opozitarë sot, më 3 gusht 2015 e patën votuar Gjykatën Speciale; dhe, 15 deputetë opozitarë që janë tani e e patën votuar demarkacionin me Malin e Zi me 21 mars 2018. E këta deputetë të papenduar për këto 4 votime aq të këqija nuk e votojnë Albulena Haxhiun, dhe bile ia pamundësojnë kuorumin Kuvendit për votim të fshehtë. 5 deputetë opozitarë i kanë votuar të katërtat këto të këqija, kurse Albulena asnjërën prej tyre”, ka thënë Kurti në mbledhjen e Këshillit të Lëvizjes Vetëvendosje.