Kurti: Këto varre në Rezallë janë e vërteta, janë dëshmi e gjenocidit të Serbisë në Kosovë.

Kryeministri i Kosovës, Albin Kurti, sot ka marrë pjesë në ceremoninë e varrimit në Rezallë të Drenasit të martirëve të cilëve eshtrat iu janë gjetur në varreza masive në Kizhevak e Rudnicë të Serbisë.

Ai ka deklaruar se janë bashkë për të nderuar sot dëshmorët e martirët e Kosovës, e për të mos lejuar harresën të mbulojë mizoritë që ndodhën në luftë.

“Sot, 22 vite e gjysmë pas ditës të kobshme, po kthehen për të pushuar përjetësisht në tokën e tyre: Shefqeti, Sadriu, Dibrani, Jonuzi, Hetemi, Neziri, Nazifi, Veseli e Behrami. Të pushkatuar me pothuajse të gjithë burrat dhe djemtë e rinj në Rezallë, më 5 prill të vitit 1999, nga forcat e shtetërore të Serbisë, u rrëmbyen e groposen, në varreza masive në Kizhevak e Rudnicë të Serbisë”.

“Por e vërteta nuk mund të groposet e mbulohet në varreza masive. Këto varre këtu janë e vërteta, janë dëshmi e gjenocidit të Serbisë në Kosovë. Kemi obligim që të bëjmë gjithë sa mundemi e dimë që t’i prejmë rrugën drejtësisë së munguar për krimet çnjerëzore të kryera nga forcat policore serbe dhe ushtria jugosllave gjatë luftës në Kosovë”,ka thënë Kurti.

Fjalimi i plotë:

Të dashura familje Deliu, Hoti, Rukolli dhe Zabeli,
I nderuari Kryetar i Kuvendit të Republikës së Kosovës, z. Glauk Konjufca,
I nderuari Kryesues i Komisionit Qeveritar për Personat e Zhdukur, z. Andin Hoti,
I nderuari Kryetar i Komunës së Skenderajt, z. Bekim Jashari,
I nderuari Ministër i Mbrojtjes së Republikës së Kosovës, z. Armend Mehaj,
Të nderuar ish-luftëtarë, invalidë e veteranë të Ushtrisë Çlirimtare të Kosovës,
I nderuari baca Rifat Jashari,
Të nderuar klerikë fetarë,
Motra dhe vëllezër,
Të dashur qytetarë të Rezallës,

Në këtë ditë të rëndë nuk është e lehtë të gjenden fjalë ngushëllimi që mund të plotësojnë zbrazëtinë që ka lënë mungesa e të dashurve tuaj.
Është e vështirë të gjejmë fjalë mjaftueshëm të fuqishme për të përshkruar forcën, guximin dhe durimin tuaj të palëkundshëm përgjatë këtyre viteve.
Sot, 22 vite e gjysmë pas ditës të kobshme, po kthehen për të pushuar përjetësisht në tokën e tyre: Shefqeti, Sadriu, Dibrani, Jonuzi, Hetemi, Neziri, Nazifi, Veseli e Behrami.
Të pushkatuar me pothuajse të gjithë burrat dhe djemtë e rinj në Rezallë, më 5 prill të vitit 1999, nga forcat e shtetërore të Serbisë, u rrëmbyen e groposen, në varreza masive në Kizhevak e Rudnicë të Serbisë.

Por e vërteta nuk mund të groposet e mbulohet në varreza masive.
Këto varre këtu janë e vërteta, janë dëshmi e gjenocidit të Serbisë në Kosovë.
Kemi obligim që të bëjmë gjithë sa mundemi e dimë që t’i prejmë rrugën drejtësisë së munguar për krimet çnjerëzore të kryera nga forcat policore serbe dhe ushtria jugosllave gjatë luftës në Kosovë.

Të dashur familjarë,

Jemi bashkë për të nderuar sot dëshmorët e martirët e Kosovës, e për të mos lejuar harresën të mbulojë mizoritë që ndodhën në luftë.
Jemi gjithmonë bashkë në betejën për të vërtetën dhe drejtësinë.
Nuk do të ndalemi derisa të sjellim drejtësi për ta.
I përjetshëm qoftë kujtimi për familjarët tuaj.
I lehtë u qoftë dheu i Kosovës.
Lavdi!