Kurti: “Sot në Kosovë jetohet me shumë dinjitet”

Albin Kurti është i bindur se qeverisja e tij është shumë e mirë – më e mira.

Prandaj, thotë se qytetarët sot jetojnë me dinjitet.

“As një e treta e mandatit nuk ka kaluar dhe afër 600 milionë euro janë shpërndarë. Në Kosovë jetohet me shumë më shumë dinjitet, edhe pse ka politika sociale, edhe se qeveria nuk vjedh”, tha Kurti në Kuvendin e Kosovës.

“Sa i përket ekonomisë investimet janë rritur 22 për qind, eksporti 82 për qind. Kur ka skandale në qeverisje, qytetarët thonë pse paguaj unë taksa. Por me këtë qeverisje të mirë, qytetarët paguajnë me qejf taksa”.

Kurti këto shifra i dha si replikë ndaj deklarimit të kryetarit të Lidhjes Demokratike të Kosovës, Lumir Abdixhiku.

Seanca e Kuvendit po mbahet me kërkesë të opozitës, për t’u diskutuar heqja e mundshme e akcizës dhe TVSH-së për naftën, meqë opozita e cilëson si lëndë të parë për shumë produkte të tejra dhe kështu ndikon në rritjen e çmimit të shumë produkteve.

“Kompleksiteti e ndërlikueshmëria e thënieve s’e bëjnë problemin më pak të zgjidhshëm e më pak të rëndësishëm. Ndonjëherë zgjidhjet janë shumë të lehta dhe zgjidhja është e lehtë”, pohoi Abixhiku.

“1.89 centë nafta, 60 centë i merr qeveria akcizë dhe TVSH. Ti mund të tërheqësh sot këtë 60 centësh dhe nafta të lirohet. Kaq e thjeshtë është, pse po e komplikon”.

“Kuptojeni, nuk po flasim për kthim 1 me 1, po flasim për lëndë të parë, nëse shtrenjtohet nafta, shtrenjtohet gjithçka tjetër, qindra produkte. Afati është 3 muaj njëherë me mundësi vazhdimi 3 muaj, sepse kriza është e paparashikueshme”.

Abdixhiku ka dhënë edhe shembujt e dhjetëra vendeve evropiane që kanë bërë të njëjtën gjë – kanë hequr akcizën dhe TVSH-në.