Kush është Landi Muharremi, “i tmerrshmi i Sukthit” që rrahu biznesmenin libanez e ishte në makinë me prokurorin

Prokurorit Arjan Ndoja i është bërë një atentat në Durrës, teksa ai ishte duke udhëtuar me makinën e tij. Sipas informacioneve të deritanishme mësohet se në makinë me Ndojan ka qenë në makinë dhe një person me precedent penal.

Dyshohet se Landi Muharremi ndodhej në makinë me prokurorin Arjan Ndoja që sot ju bë atentat pranë mbikalimit të Shkozetit në Durrës. Muharremi nuk është një emër i panjohur për Policinë pasi në shtator të vitit 2016 ai u shpall në kërkim nga policia për rrahjen e biznesmenit libanez Faadi Mitri në sy të gruas dhe vajzës së tij.

Landi Muharremi që njihet dhe si i “tmerrshmi i Sukthit”, u shpall në kërkim në atë kohë dhe akuzohej si autori i rrahjes së biznesmenit. Muharremi kishte pretendime mbi pronësinë e sipërfaqes së zonës turistike në zonën e Gjirit të Lalzit ku pritej që të investonte biznesmeni libanez me ndërtimin e një kompleksi, i cili pas dhunimit me shkop bejzbolli u largua nga Shqipëria.

‘Omnix Albania’, kompania e Mitrit do të investonte 450 milionë euro tek Gjiri i Lalzit. Por pas dhunimit fizik që iu bë presidentit të Omnix Fadi Mitri, kompania u tërhoq nga investimi në Shqipëri.

Atentati ndodhi pasditen e sotme teksa prokurori Arjan Ndoja po udhëtonte me dy persona të tjerë në automjetin tip “Benz” të llojit fuoristradë me targa ‘AA 333 ZD’, pranë Mbikalimit të Shkozetit. Bashkë me Ndojan kanë mbetur të plagosur edhe dy personat e tjerë, shoferi i prokurorit, Andi Maloku 30 vjeç dhe Aleksandër Laho, i cili ishte pasagjer. Laho njihet ndryshe edhe si Landi Muharremi dhe si “i tmerrshmi i Sukthit”.