Macron: Nëse ndryshon regjimi në Iran, Lindja e Mesme do të zhytet në kaos

Presidenti i Francës, Emmanuel Macron, paralajmëroi se çdo përpjekje për ndryshim regjimi në Iran përmes ndërhyrjes së jashtme mund të çojë në një kaos të madh në rajonin e Lindjes së Mesme.

Duke komentuar zhvillimet e fundit në Iran, Macron deklaroi se një ndërhyrje e tillë do të ishte “gabimi më i madh që mund të bëhet sot”. Ai shtoi se një përmbysje me forcë e regjimit iranian do të hapte rrugën për destabilizim të madh në të gjithë rajonin.

“LINDJA E MESME DO TË ZHYTET NË KAOS”

Macron, duke iu referuar ndryshimit të qëndrimeve të Presidentit amerikan Donald Trump, theksoi se përmbysja e regjimit iranian do të sjellë pasoja më të mëdha negative sesa pritet.

MACRON PARALAJMËRON EDHE NË SAMITIN E G7-ës

Gjatë Samitit të Liderëve të G7-ës në Kanada, Macron dha deklarata të forta lidhur me tensionet në rritje midis Izraelit dhe Iranit. Në një kohë kur luftimet kishin hyrë në ditën e pestë, dhe kryeministri izraelit Benjamin Netanyahu kishte bërë thirrje për rebelim ndaj regjimit iranian dhe aluduar për atentat kundër liderit suprem Ali Khamenei, Macron paralajmëroi se përmbysja e regjimit përmes ndërhyrjes së huaj do të ishte një gabim strategjik i rëndë.

Macron tha: “Të mendosh se një vend mund të shpëtohet nga jashtë me bomba, pa vullnetin e popullit të tij, është një iluzion i madh.” Ai rikujtoi se ndërhyrjet e mëparshme ushtarake për ndryshim regjimesh kanë sjellë pasoja tragjike.

NETANYAHU ME MESAZHE PËR “ATENTAT NDAJ KHAMENEIT”

Izraeli, që më 13 qershor nisi sulme të gjera ndaj Iranit, veçanërisht kundër objekteve bërthamore dhe caqeve ushtarake të larta, përshkallëzoi tensionin. Kryeministri Netanyahu, tri ditë pas sulmeve, paralajmëroi për mundësinë e atentatit ndaj liderit iranian Khamenei dhe deklaroi: “Do të bëjmë çfarëdo që të jetë e nevojshme.”

Zyrtarë izraelitë kanë publikuar në rrjete sociale mesazhe që nënkuptojnë ndryshim regjimi, ndërsa Netanyahu u bëri thirrje opozitarëve iranianë që të ngrihen kundër regjimit, duke thënë: “Irani mund të bëhet sërish i madh.”