Nga fillimi i luftës në Rripin e Gazës, mes Hamasit dhe Forcave të Mbrojtjes së Izraelit (IDF) numri i viktimave mes të dyja palëve i ka kaluar 2 mijë e 500 të vdekur.
Numri i të vdekurve izraelitë që nga fillimi i luftës ka vazhduar të rritet, duke arritur në 1 mijë e 300, sipas raporteve të mediave hebraike.
Fati i rreth 150 personave të rrëmbyer dhe dërguar në Rripin e Gazës gjatë sulmit shkatërrues nga grupi terrorist Hamas është ende i paqartë.
Rreth 3 mijë e 300 janë plagosur, përfshirë 28 në gjendje kritike dhe 350 në gjendje të rëndë.
Ministria e Shëndetësisë e drejtuar nga Hamasi thotë se 1 mijë e 203 janë vrarë dhe 5 mijë e 769 kanë mbetur të plagosur në Rripin e Gazës.
IDF-ja thotë se ka vrarë rreth 1 mijë e 500 terroristë në territorin izraelit.
Të paktën 22 shtetas amerikanë janë konfirmuar të vdekur pas bastisjes ndërkufitare të Hamasit në Izrael, ka thënë Departamenti Amerikan i Shtetit.
Qytetarët amerikanë janë gjithashtu në mesin e qindra njerëzve të marrë peng nga grupi militant palestinez.
Forcat e Mbrojtjes së Izraelit (IDF) thonë se po kryejnë sulme ajrore “të përhapura” kundër shumë vendeve të Hamasit në të gjithë Rripin e Gazës.
IDF-ja e bëri njoftimin rreth orës 4 të mëngjesit dhe shton se do të japë detaje të mëtejshme mbi sulmet.
Zëdhënësi i IDF-së tha të enjten në mëngjes se Forcat Ajrore sulmuan selitë që i përkisnin njësisë komando të Hamasit në të gjithë Gazën gjatë gjithë natës dhe se një anëtar i lartë i forcës detare të organizatës terroriste u vra gjatë sulmeve.
Sipas njoftimit, forca komando e Hamasit (“Nohva”) ishte një nga drejtuesit e bastisjes në qytetet izraelite të shtunën, dhe selitë që u sulmuan u përdorën nga luftëtarët e tij që morën pjesë në sulm.
Gjithashtu u raportua se në një sulm në Rafah, u vra Muhammad Abu Shamla, një operativ i lartë nga marina e Hamasit.
Sipas IDF-së, shtëpia e Abu Shamla u përdor gjithashtu për të ruajtur armët detare të destinuara për sulme kundër Izraelit.
Sulmet e IDF-së në Rripin e Gazës vranë 33 persona brenda dy orëve gjatë natës të së enjtes sipas një korrespondenti të Al Jazeera në Gaza.
Sipas raportimit, avionët luftarakë sulmuan shtëpi në disa zona dhe grupet e mbrojtjes civile gjetën trupat e të vdekurve.
I dërguari shtoi se që nga fillimi i luftimeve, gjashtë lagje në Rripin e Gazës ishin shkatërruar.
Zëdhënësi i IDF-së për Median Ndërkombëtare, Jonathan Conricus pohoi të enjten se IDF-ja po “i jep përparësi sulmit ndaj komandantëve të Hamasit”.
“Kur kemi inteligjencë që tregon vendndodhjen e një komandanti të lartë, ne po sulmojmë”, tregon ai.
Conricus i bëri komentet në një përditësim të përditshëm të shpërndarë nga zëdhënësi i IDF-së për mediat e huaja.
Zyrtari izraelit shtoi se që kur Hamasi mori Rripin e Gazës, ka ndërtuar “një rrjet tunelesh nën qytetin e Gazës, që është qendra, deri në Khan Yunis dhe Rafah”.
“Ne po përpiqemi të arrijmë shtresën e poshtme që Hamasi ka ndërtuar për vete”, tha ai. “Nuk është menduar për hyrjen e civilëve, nuk është bunkerë për qytetarët e Gazës kur sulmon Izraeli, është për përdorimin e Hamasit dhe terroristëve të tjerë në mënyrë që ata të vazhdojnë të gjuajnë raketa dhe të dërgojnë terroristë”.
Duke folur me udhëheqësit hebrenj amerikanë të mërkurën mbrëma, presidenti Joe Biden dënoi sulmin e Hamasit ndaj Izraelit si “ditën më vdekjeprurëse për hebrenjtë që nga Holokausti” dhe “një nga kapitujt më të këqij në historinë njerëzore”.
“Unë refuzoj të hesht dhe e di që edhe ju refuzoni të heshtni”, tha ai mes duartrokitjeve.
Për çështjen e pengjeve, Biden tha se ai “nuk ka hequr dorë nga shpresa për t’i sjellë këta njerëz në shtëpi”.
“Ne duam ta bëjmë të qartë”, shtoi presidenti. “Ne jemi duke punuar në çdo aspekt të krizës së pengjeve në Izrael, duke përfshirë vendosjen e ekspertëve për të këshilluar dhe ndihmuar në përpjekjet për rimëkëmbje”.
