Më shumë se 300 persona me simptoma helmimi janë paraqitur në spitalin e Krujës që prej mbrëmjes të së hënës. Qytetarë të grupmoshave të ndryshme kanë kërkuar trajtim mjekësor sepse pjesa më e madhe kishin diarre e të vjella që shkaktojnë dehidratim.
Dyshimet e para janë te uji i pijshëm. Për këtë arsye është ndërprerë furnizimi me ujë nga rrjeti i ujësjellësit në Krujë.
Mbi 80 për qind e popullatës në Krujë konsumon ujin e çezmës në përditshmërinë e tyre.
Drejtues të ujësjellësit të Krujës shprehen se janë në pritje të analizave të ujit për të vërtetuar dyshimet që kanë rënë mbi ujin si burim infeksioni për banorët dhe ndërmarrë veprime të mëtejshme.
