Kreu i Kishës Ortodokse të Malit të Zi, Amfilohije Radoviq, u solidarizua me viktimat e tërmetit në Shqipëri.
Mitropoliti Amfilohije shkoi për vizitë te Kryepeshkopi i Kishës Ortodokse Shqiptare, Anastas, dhe në shenjë solidarizimi me viktimat e tërmetit, në emër të Mitropolisë së Malit të Zi kishte sjellë dy mijë euro.
Mirëpo, Klan Kosova mëson se kjo vizitë e mitropolitit pro rus Amfilohije pati një qëllim tjetër më të madh.
Ai shkoi për të lobuar tek kryepeshkopi Anastas që Kisha Ortodokse Shqiptare mos ta njeh pavarësinë e Kishës Ortodokse ukrainase dhe të distancohet nga vendimi i Patriarkut të Kostandinopojës, Bartolomeut.
Këtë lobim mitropoliti Amfilohije e bëri në emër të patriarkut rus Kiril që e kundërshton pavarësimin e Kishës Ortodokse të Ukrainës nga ajo e Rusisë.
Mitropoliti i Malit të Zi, Amfilohije Radoviq, është i njohur për qëndrimet e tij nacionaliste serbe dhe mbështetës i madh i Rusisë dhe Kishës Ortodokse ruse.
Amfilohije angazhohet që Kisha Ortodokse ruse të shtrijë më tepër ndikimin në raport me Patrikanën e Kostandinopojës.
