Nato del në krah të Kosovës për aksionin në veri, rrëzon BE: “Prishtina ka të drejtë”

NATO-ja e sheh operacionin e Policisë së Kosovës në 13 tetor kundër kontrabandës së mallrave si, “veprim për vendosjen e ligjit” dhe tha se misioni i KFOR-it atje është në komunikim të vazhdueshëm me autoritetet.

Një zyrtar i aleancës veri-atlantike u shpreh se “Policia e Kosovës është duke kryer një operacion të zbatimit të ligjit përgjatë Kosovës” dhe se “misioni i KFOR-it, i udhëhequr nga NATO-ja është në komunikim të pandërprerë me të gjitha institucionet dhe me përfaqësuesit e bashkësisë ndërkombëtare”.

Në përgjigjen e zyrtarit të NATO-s përsëritet se misioni i aleancës veri-atlantike në Kosovë “mbetet tërërisht i fokusuar në zbatimin e përditshëm të mandatit të OKB-së, sipas Rezolutës 1244 nga viti 1999 dhe vazhdon të sigurojë ambient të qetë, të sigurt dhe lëvizje të lirë për të githa komunitetet që jetojnë në Kosovë”. Në këtë reagim të këtij zyrtari të NATO-s thuhet edhe se “KFOR-i vazhdon të ndihmojë në zbatimin e marrëveshjes së fundit për shtensionimin e tensioneve që kanë arritur Beogradi dhe Prishtina në kuadër të dialogut të lehtësuar nga BE-ja”, duke iu referuar paktit të 30 shtatorit.

Aksioni policor i një dite më parë u zhvillua në rajonin e Prishtinës, Pejës, Mitrovicës së Jugut dhe Mitrovicës së Veriut. Policia sqaroi se në kuadër të tij janë sekuestruar mallra “të kontrabanduara në vlerë prej qindra mijëra euro, të cilat shërbejnë si prova materiale, e që kanë qenë të vendosura në objekte të ndryshme si biznese, magazina/depo etj”. Tetë persona janë arrestuar e janë shpallur në kërkim edhe 10 të tjerë që dyshohen si të përfshirë në kontrabandën e mallrave.