Është shpallur një vendim për rastin e njohur si “gylenistët”, në të cilin u arrestuan gjashtë shtetas turq në Kosovë në mars të vitit të kaluar dhe për të cilin u shkarkuan nga pozita ish-ministri i Brendshëm, Flamur Sefaj dhe ish-shefi i AKI-së, Driton Gashi.
Një gjykatë turke ka marrë vendim për të dënuar me nga shtatë vite e gjashtë muaj burgim dy nga gjashtë turqit e arrestuar në Kosovë, nën dyshimin se janë “pjesëtarë të organizatës terroriste FETO”, të udhëhequr nga kleriku turk, Fethullah Gylen.
Ata u arrestuan në Kosovë vitin e kaluar përmes një operacioni të Agjencisë Kombëtare Turke të Inteligjencës (MIT) në bashkëpunim me inteligjencën e Kosovës, raporton AA.
Në aktakuzën e përgatitur nga Prokuroria Republikane e Stambollit, gjashtë të dyshuarit, ndër të tjera, ngarkoheshin me akuzat “Drejtim i një organizate terroriste të armatosur” dhe “Spiunim ndërkombëtar” dhe për ta ishte kërkuar burgim nga 16 vite e gjashtë muaj deri në 28 vite.
Gjykata e Krimeve të Rënda e Stambollit kishte ndarë lëndën për Osman Karakaya dhe Cihan Ozkan.
Kujtojmë se më 29 mars të vitit të kaluar, shtetasit turq, Cihan Ozkan, Kahraman Demirez, Hasan Hüseyin Günakan, Mustafa Erdem, Osman Karakaya dhe Yusuf Karabina u dëbuan nga Kosova në mënyrë të jashtëligjshme.
Kryeministri i atëhershëm, Ramush Haradinaj, e kishte dënuar këtë rast, ku edhe shkarkoi nga detyra ministrin e Punëve të Brendshme Flamur Sefajn, dhe drejtorin e AKI-së, Driton Gashin.
E në të njëjtën ditë të dënimit të dy shtetasve turq në vendin e tyre të origjinës, ka ardhur dorëheqja e Shpend Maxhunit, njeriut që e pasoi Driton Gashin në krye të Agjencisë Kosovare të Inteligjencës (AKI).
Kreu i AKI-së Shpend Maxhuni ka dhënë sot dorëheqja nga pozita. Kështu ka njoftuar kryeministri në detyrë i Kosovës Ramush Haradinaj.
Haradinaj përmes një postimi të tij në Facebook, ka falënderuar Maxhunin për kontributin që ka dhënë në krye të Inteligjencës kosovare, përcjell Insajderi.
“Kam pranuar dorëheqjen e Drejtorit të AKI-së, z. Shpend Maxhuni, nga funksioni i tij në krye të Inteligjencës kosovare. Z. Maxhunin e falënderova për bashkëpunimin profesional të deritashëm në mbrojtjen e sigurisë së vendit dhe popullit tonë”, ka shkruar Haradinaj.
