Në Mbretërinë e Bashkuar sot po i jepet lamtumira e fundit Mbretëreshës Elizabeth II, e cila vdiq me 8 shtator.
E derisa po vazhdon ceremonia e funeralit, në Kukës është zbuluar .busti i monarkes britanike.
Ky bust është vendosur para Pallatit të Kulturës, për të shprehur vlerësimin e qytetarëve kuksianë për Mbretëreshën, e cila qëndroi për 70 vite në fronin e Britanisë së Madhe.
Mësohet se busti është ndërtuar falë kontributit të emigrantëve kuksianë në Angli.
Megjithatë, disa minuta pasi busti u vendos aty ai u hoq nga autoritetet, të cilat thonë se nuk kanë informacion se kush e ka vendosur.
Ndryshe, disa javë më parë, kur Elizabeth II ishte ende gjallë, bashkia e këtij qyteti kishte shprehur dëshirën për të ngritur një bust të Mbretëreshës në qendër të qytetit, duke qenë se shumica e emigrantëve nga këto zona kanë zgjedhur pikërisht Mbretërinë e Bashkuar si vend për të jetuar e punuar. Por, për ta bërë këtë duhet një leje e posaçme nga familja mbretërore./a2news
