Në Shqipëri, nga sot, do të hyjnë në fuqi masat e reja kundër pandemisë. Nga 4 janari, punëtorët e administratës publike, ata të qendrave tregtare dhe supermarketeve duhet të dorëzojnë certifikatën e vaksinimit për t’u paraqitur në punë, ose nëse s’duan të vaksinohen duhet të bëjnë test çdo pesë ditë.
Në mbledhjen e shkuar në Shqipëri autoritetet vendosën po ashtu që për shkak të përhapjes së variantit Omicron, në Shqipëri t’u ndalohet hyrja shtetasve të huaj me histori udhëtimi brenda dy javëve të fundit në Afrikë të Jugut, Keni, Angolë, Zambi, Bostwana e Senegal.
Shtetasit shqiptarë rezidentë, që vijnë në Shqipëri dhe kanë histori udhëtimi 14 ditët e fundit para mbërritjes, në vendet e listuara më sipër do të karantinohen në shtëpitë e tyre për 14 ditë dhe do të monitorohen nga njësitë shëndetësore.
Në Shqipëri vazhdon të vlejë ora policore në periudhën 23:00-06:00. Në kufij të gjithë duhet të dorëzojë certifikatën e vaksinës, ose testin negativ.
Aktualisht janë mbi 6000 raste aktive me COVId-19 në Shqipëri. Mbi 3200 persona kanë humbur betejën me virusin.
