Netanyahu nuk përjashton eliminimin e Khameneit, mendon se do të sillte stabilitet

Kryeministri izraelit, Benjamin Netanyahu, ka refuzuar të përjashtojë vrasjen e Udhëheqësit Suprem të Iranit, Ayatollah Ali Khamenei.

Në një intervistë me transmetuesin amerikan ABC News, Netanyahu thotë se çdo plan i mundshëm për të vrarë udhëheqësin iranian “nuk do ta përshkallëzojë konfliktin, por do ta përfundojë atë”.

Dhe, i pyetur drejtpërdrejt nëse Izraeli do ta shënjestrojë udhëheqësin suprem, Netanyahu përgjigjet: “Po bëjmë atë që duhet të bëjmë”.

“Ne kemi shënjestruar shkencëtarët e tyre më të mirë bërthamorë”, shton ai. “Kemi ende punë për të bërë në vende të tjera”.

Kryeministri izraelit gjithashtu sugjeroi që vendimi i tij për të shënjestruar Iranin është bërë “në shërbim të njerëzimit” për t’u mbrojtur nga kërcënimi i supozuar bërthamor i Iranit.

“Sot është Tel Avivi, nesër është New York-u”, tha ai. “Unë kuptoj Amerikën të parën, nuk e kuptoj Amerikën e vdekur”.

Netanyahu ka thënë po ashtu së fundmi se “Izraeli është në rrugën e fitores”.

Ai ka thënë gjithashtu se forca ajrore izraelite ka “kontroll” të qiellit mbi Teheran.

Netanyahu ka shtuar se “jemi në rrugën e duhur për të arritur dy objektivat tona kryesore, eliminimin e kërcënimit bërthamor dhe eliminimin e kërcënimit me raketa”.

“Forcat Ajrore Izraelite kontrollojnë qiellin mbi Teheranin. Ne po godasim objektivat e regjimit – ndryshe nga regjimi kriminal i Iranit, i cili synon civilët”, ka shtuar Netanyahu, duke folur në Bazën Ajrore Tel Nof.

“Po u themi qytetarëve të Teheranit: ‘Evakuohuni’ dhe ne po ndërmarrim veprime”.

Ndërsa presidenti amerikan, Donald Trump, ka thënë se tani është një çast i përshtatshëm për të folur me Iranin, nëse udhëheqësit e këtij të fundit janë të gatshëm për bisedime.

Këtë, kreu i Shtëpisë së Bardhë e tha teksa ishte në margjinat e Samitit të G7, duke mbështetur po ashtu plotësisht çfarë Izraeli po bën në konflikt me Iranin.

Sipas Trump, Irani nuk po e fiton këtë luftë dhe përpara se të jetë shumë vonë, Irani duhet të zgjedhë të flasë.

Duke folur me gazetarët në Samitin e G7 në Kanada, Presidenti i SHBA-ve, Donald Trump, u pyet se çfarë do të duhej që Shtetet e Bashkuara të bashkoheshin në luftën kundër Iranit, të cilës ai iu përgjigj: “Nuk dua të flas për këtë”.

Teksa po ashtu mësohet se se nuk ka ndërmend të nënshkruajë deklaratën e G7-ës mbi Izrael dhe Iranin, thanë zyrtarët për partnerin amerikan të BBC-së, CBS News.