Nis zbatimi i planit të Trump, emigrantët e paligjshëm nga SHBA dërgohen në Guantanamo

Fluturimi i parë për deportimin e emigrantëve të paligjshëm nga SHBA në bazën amerikane të Guantanamos në Kubë është planifikuar për sot. Lajmi është publikuar nga CNN, i cili citon burime të zyrtarëve amerikanë të njohur me planin.

Masa buron nga memorandumi i Presidentit Donald Trump që udhëzon qeverinë federale të përgatisë bazën detare të SHBA-së atje për të strehuar dhjetëra mijëra emigrantë. Ndërsa Gjiri i Guantanamos ka një qendër për përpunimin e emigrantëve, ajo është përdorur kryesisht për migrantët e ndaluar në det, jo të sjellë nga Shtetet e Bashkuara.

Sipas burimeve për CNN ende nuk dihet se për sa kohë mund të mbahen ligjërisht migrantët atje dhe cilat do të ishin të drejtat e tyre gjatë ndalimit. Është gjithashtu e paqartë nëse emigrantët do të kenë akses në shërbimet ligjore, apo sociale gjatë kohës që janë të ndaluar në bazë.

Zyrtarët e lartë të Trump kanë vazhduar të reklamojnë planin, duke e konsideruar atë si një strukturë të krijuar për kriminelët.

“Është vendi i përsosur për të siguruar emigrantët që po udhëtojnë jashtë vendit tonë … por edhe kriminelët e ashpër,” tha Sekretari i Mbrojtjes Pete Hegseth në kufirin jugor të SHBA të hënën.

Asetet e Pentagonit tashmë janë dërguar në bazë për të ndërtuar tenda pranë qendrës së operacioneve të emigrantëve për të strehuar emigrantët. Çadrat e para nisën të ngriheshin javën e kaluar, thanë burimet.