Një gjermane që promovon Shqipërinë, përpjekjet e Leas për të shpërndarë imazhin e turizmit të qëndrueshëm

“Shqipërisë i duhet një imazh, madje një fytyrë e re për të joshur turistët dhe kjo mund të arrihet vetëm nëpërmjet promovimit”. Në këtë përfundim ka arritur pas 6-muajve qëndrim kryesisht në Tiranë, Lea Lohmüller, një studente gjermane që po synon të promovojë turizmin e qëndrueshëm shqiptar.

“Unë jam duke punuar me projekte të ndryshme, të cilat i bashkon “turizmi i qëndrueshëm”. Në thelb ne po përpiqemi të ndihmojmë në promovimin e turizmit shqiptar, gjithmonë në rrafshin e qëndrueshmërisë afatgjatë”.

Për Lean, promovimi i turizmit nuk duhet të përfshijë vetëm sezonin veror.

“Mendoj se problemi lidhet me konceptin e “turizmit sezonal”. Njerëzit vijnë kryesisht vetëm në verë, kryesisht për të shkuar në plazh.. Duhet punuar përmes promovimit të destinacioneve për të pasur turistë gjatë gjithë vitit. Njerëzit mund të shkojnë për ngjitur malet apo vizituar sitet kulturore në çdo stinë të vitit.”

Po çfarë është turizmi i qëndrueshëm? Ekspertë të fushës tregojnë edhe se si mund të arrihet ky objektiv.

Vitet e fundit janë bërë përpjekje të kushtueshme për promovimin e Shqipërisë, por ato s’kanë qenë asnjëherë të mjaftueshme dhe tërësisht të efektshme.