Kosova shkon një hap më pranë NATO-s, duke marrë statusin si anëtar i asociuar në Asamblenë Parlamentare. Siç raportohet, në eventin e mbajtur në Sofje, shumica e vendeve kanë votuar pro, 1 shtet ka qenë kundër dhe 14 kanë abstenuar.
Kështu, Kosova kalon nga vend vëzhgues në anëtare e asociuar. Ky mekanizëm i aleancës ushtarake përbëhet nga 281 delegatë nga të 32 vendet anëtare.
Përveç Kosovës, anëtare të asociuara janë dhe nëntë vende te tjera, në mesin e tyre edhe Serbia e Bosnjë-Hercegovina.
Gjatë punimeve në Sofje të Bullgarisë, një delegacion serb ka dorëzuar një letër të kryeparlamentares Ana Brnabiç, që kërkonte që Kosovës të mos i avancohej statusi në NATO. Por siç duket, nuk është marrë parasysh kjo përpjekje e radhës e Beogradit për të penguar Kosovën.
