“Një kthim në luftën e ftohtë”, The Guardian: Putin dhe Kim i bashkuan forcat si delikuentë globalë

Pakti sfidues i miqësisë Rusi-Kore e Veriut ngre pyetje të mëdha për Washingtonin dhe Seulin – por edhe për Pekinin, shkruan The Guardian në një analizë për takimin e Vladimir Putin me Kim Jong-un.

Një çerek shekulli më parë, Vladimir Putin fluturoi në Phenian për ta nënshkruar një “traktat miqësie” me Kim Jong-il që ndihmoi në ringjalljen e marrëdhënieve të Rusisë me Korenë e Veriut pa i detyruar të dyja palët t’i vijnë në ndihmë njëra-tjetrës në rast të një sulmi ushtarak.

Me vizitën e tij javën e kaluar, Putin në fakt ka shkuar më tej në të kaluarën, duke nënshkruar një marrëveshje me Kim Jong-un që të kujton paktin e sigurisë të vitit 1961 që ekzistonte nën Bashkimin Sovjetik gjatë Luftës së Ftohtë. Por sot Rusia është përfshirë në një luftë të nxehtë në Ukrainë, të cilën Putini e ka bërë prioritet të politikës së tij të jashtme, dhe një Kore e Veriut bërthamore është bërë një litar shpëtimi thelbësor i municioneve për ushtrinë e tij, shkruan gazeta britanike, përcjell Gazeta Express.

“Traktati që Putini nënshkroi me Kim Jong-un ishte një rikthim në luftën e ftohtë, por sigurisht në luftën e ftohtë Koreja e Veriut nuk kishte armë bërthamore”, tha Dr Edward Howell, bashkëpunëtor i Fondacionit Kore me programin Azi-Paqësor në Chatham House, dhe pedagog në Universitetin e Oksfordit.

Ndërsa samiti i javës së kaluar ishte vite në përgatitje, megjithatë ai shënoi një pikënisje në marrëdhëniet e Rusisë me Korenë e Veriut dhe i tillë që zyrtarët amerikanë kanë paralajmëruar se mund ta destabilizojë një akt të pakëndshëm balancues në rajon.