Një luftë e re afër të shpërthejë, zbulojnë imazhet satelitore

Venezuela po zgjeron bazat ushtarake pranë kufirit me Guayanan dhe po vendos forca në kufirin rreth xhunglës ndërsa presidenti Nicolas Maduro ka rritur kërcënimet për të aneksuar fqinjin e pasur me naftë, kanë zbuluar imazhet satelitore, shkruan The Guardian.

Maduro u zotua në bisedimet e ndërmjetësimit në dhjetor se nuk do të ndërmarrë veprime ushtarake kundër fqinjit, por pamjet e shpërndara nga Qendra për Studime Strategjike dhe Ndërkombëtare (CSIS) në Uashington të premten tregojnë për grumbullim forcash.

“Në të njëjtën ditë që ministri i Jashtëm i Venezuelës po takohet me diplomatët e Guayanas, ushtria venezueliane po kryen stërvitje tankesh pranë Guayanas. E gjithë kjo na tregon se Maduro po ndjek politikë të dyfishtë”, ka thënë Christopher Hernandez-Roy, zëvendësdrejtor i programit amerikan të CSIS.

Venezuela e ka pretenduar prej kohësh rajonin e pasur me burime, Essequibo, i cili përbën dy të tretat e Guayanas, por Maduro ka rritur retorikën për territorin e diskutueshëm muajt e fundit.

Pas muajsh fushate, Venezuela mbajti votim në dhjetor në të cilin Maduro ka thënë se populli venezuelian e mbështeti për të marrë me forcë pjesën e madhe të xhunglës.

Pamjet ajrore tregojnë se ndërsa diplomatët venezuelianë u takuan me homologët e tyre nga Guayana për të qetësuar tensionet, ushtria venezueliane dërgoi tanke dhe anije patrullimi të pajisura me raketa në kufi.

“Kjo sjellje përshkallëzuese nga ana e Venezuelës krijon mundësi për llogaritje të gabuara dhe humbje të kontrollit mbi ngjarjet në terren”, paralajmëron CSIS në raportin mbi mosmarrëveshjen në përshkallëzim.

Mosmarrëveshja po gjykohet në Gjykatën Ndërkombëtare të Drejtësisë në Hagë, por Maduro dëshiron të shpërfillë Gjykatën e OKB-së dhe të negociojë drejtpërdrejtë me Guayanan.

Analistët e kishin parë sulmin e Maduros si mjet për të krijuar mbështetje përpara zgjedhjeve që priten këtë vit, por kanë sugjeruar se mund të jetë gjithashtu përpjekje për t’i bërë presion Guayanas për të ndarë të ardhurat nga zbulimet e fundit të naftës.

Ekonomia e Venezuelës ka rënë në dekadën e fundit, pavarësisht se ka disa nga depozitat më të mëdha në botë.

Brazili vendosi më shumë trupa në kufirin me Guayanan dhe Venezuelën këtë javë mes tensioneve në rritje në rajon dhe SHBA-ja ka rënë dakord të forcojë mbrojtjen e Guayanas me avionë të rinj, helikopterë, drone ushtarake dhe teknologji radari.