Osmani për shkarkimin e Dakës: Askush nuk më zmbrapsë me kërcënime në Gjykatën Kushtetuese

Presidentja e Kosovës, Vjosa Osmani, në konferencën e sotme për media, ka folur për kritikat që ka marrë për shkarkimin e ish-kryesueses së Komisionit Qendror të Zgjedhjeve, Valdete Daka.

Ajo ka thënë se KQZ-ja, pas shkarkimit të Dakës ka pasur zhvillime pozitive. Njëkohësisht për këtë ajo ka krahasuar raportin e zgjedhjeve të fundit, në të cilat Daka ishte në krye të këtij institucioni.

“Jam shumë e kënaqur që zgjedhjet e 17 tetorit janë cilësuar ndër më të mirat dhe ndër më demokratiket. Ky është lajm i shkëlqyeshëm për Republikën e Kosovës dhe tregon për maturinë dhe demokracinë që ka vendi ynë. Poashtu jam tejet e lumtur që vlerësimi i punës së KQZ-së aktuale është shumë pozitive. Kjo është një e arritur. Përdëllim nga raporti i kaluar i këtij institucioni, që për zgjedhjet e 14 shkurtit përcaktonte se KQZ në disa raste ka lejuar trajtim, të pabarabartë të votuesve, tejkalim të kompetencave nga ish-kryesuyesja duke tentuar që të diktohet puna e PAZAP-së dhe kufizim të ndjeshëm të së drejtës për zgjedhje efektive”, tha ajo.

Tutje ajo shtoi se e kundërshton pretendimin se ajo nuk është bazuar në Ligjin për Presidenten e Republikës së Kosovës, gjatë marrjes së vendimit për shkarkimin e Valdete Dakës nga KQZ-ja.

“Këtë deklaratë preliminare e kundërshtoj konstatimin në njërën nga fusnotat e kësaj deklarate përmes së cilës tentohet që t’i jepet konotacion plotësisht politik ndërprerjes së mandatit të ish-kryesueses së KQZ-së, në muajin qershor të këtij viti. Problemi i parë qëndron në faktin se ndërprerja e këtij mandati nuk ka të bëjë me procesin zgjedhor të 17 tetorit. Pra, edhe vëzhgimi i një veprimi të tillë që është bërë para se të shpallen zgjedhjet e 17 tetorit është plotësisht jashtë mandatit të këtij ekipi Teknik sa i përket konstatimeve preliminare”, deklaroi Osmani.

Osmani madje tha se interpretimi i ligjshmërisë së vendimeve të presidentes është kompetencë e gjykatave dhe jo e misioneve.

“Siç vërehet në raport ka pasur përmirësim të dukshëm të punës së KQZ-së, dhe zgjedhjet kanë qenë të organizuara në mënyrë të shkëlqyeshme nga udhëheqja e tanishme e KQZ-së. Interpretimi i ligjshmërisë së vendimeve të presidentes është kompetencë e gjykatave kompetente, jo e misioneve, që të japin deklarata dhe konkluzione të tillë. Legjislacioni në fuqi parasheh se presidentja është autoriteti kompetent për ta emëruar kryesuesen e KQZ-së dhe autoriteti kompetent për ndërprerjen e mandatit”, ka thënë ajo.

Ajo u përgjigj edhe për deklaratat se shkarkimi i Dakës mund të shkojë në Gjykatën Kushtetuese, ku ka thënë se kërcënimet nuk e zmbrapsin.

“Mua nuk do të mund të më zmbraps askush me kërcënime për dërgim në Gjykatën Kushtetuese. Sa për mua le të më dërgojnë çdo ditë në Gjykatën Kushtetuese për nga një rast”, tha ajo.